Plotësimi i nevojave konsumatore për furnizim me energji ka detyruar Furnizuesin e Tregut të Lirë të kryejë një sërë procedura blerjesh, ndërkohë që fatura totale vetëm për 3 javët e para të nëntorit ka arritur në rreth 65 mln euro. Sipas të dhënave zyrtare, deri më tani janë blerë 239,190 Mwh, ndërkohë që në procedurat e fundit janë shënuar vlera rekord, në drejtim të çmimit me të cilin është siguruar energjia.
Kjo pasi, në disa prej blerjeve çmimi për MWH ka rezultuar në 324.24, ndërkohë që çmimi mesatar me të cilin është siguruar energjia gjatë nëntorit përllogaritet në 283.18 euro/mwh. Shifra e shpenzuar deri më tani për blerjen e energjisë është thuajse e barabartë me shpenzimet e tetorit, por ndërkohë fatura e këtij muajit nuk është përfundimtare çka nënkupton se ajo mund të jetë edhe më e lartë për shkak të blerjeve të tjera të mundshme.
Viti 2021 konsiderohet i mirë në drejtim të prodhimit të energjisë elektrike, por ndonëse sasia që blihet nga importit është më e vogël se viti I kaluar, shpenzimet mbeten të larta për shkak të çmimeve të shumëfishuara në tregjet ndërkombëtare.
Sipas të dhënave nga Enti Rregullator i Energjisë gjatë 9-mujorit të këtij viti u prodhuan 7.37 mln mwh energji nga të gjithë burimet gjeneruese në vend, gati 2-fish më shumë në raport me një vit më parë, ku për të njëjtën periudhë u gjenerua rreth 4 mln mwh energji. Ndërkaq, konsumi total i energjisë për 9-mujorin arriti në rreth 6.28 mln mwh, çka tregon se për këtë periudhë energjia e prodhuar është më e madhe se ajo e konsumuar.
