Shoqëritë e austriakëve të Vienna Insurance Group, SIGMA dhe Intersig, shënuan rritjen më të madhe të të ardhurave në tregun e sigurimeve për vitin 2024, respektivisht me 9.25% dhe 9.4% më shumë sesa viti 2023.
Rritja e të ardhurave për dy shoqëritë e VIG-ut është shoqëruar edhe me një rritje të lehtë të pjesëmarrjes në tregun e sigurimeve, duke arritur në 22% të market share për grupin austriak në tregun shqiptar të sigurimeve.
Rritjen më të madhe nominale për vitin 2024 në nivel tregu e ka shënuar SIGMA, me rreth 239 milionë lekë prime më shumë sesa një vit më parë, duke lënë pas kryesuesit e tregut, Sigal, që janë rritur me 237 milionë lekë dhe Albsigun e vendit të dytë, që është rritur me 222 milionë lekë më shumë sesa viti 2023.
Në 25-vjetorin e krijimit të shoqërisë, Sigma ka arritur të sjellë më shumë të ardhura, kryesisht nga një performancë e mirë në portofolin e sigurimit të pronës dhe sigurimin e përgjegjësive civile, duke ruajtur ndërkohë rritjen organike të sigurimit të detyrueshëm motorik. Primet e shkruara bruto në sigurimin e pronës për SIGMA-n arritën në 260 milionë lekë, me një rritje prej 14.1% krahasuar me vitin 2023, ndërkohë që Sigal ka shënuar rënie me 1.46% të primeve në këtë sigurim, ndërsa Albsig është rritur me vetëm 0.88%.
Sa i përket sigurimit të përgjegjësive civile, Sigma ka arkëtuar rreth 55.6 milionë lekë prime në vitin 2024, ose 29.5% më shumë sesa në vitin 2023, ndërkohë që pjesa më e madhe e tregut ka shënuar rënie të primeve në këtë lloj produkti.
Sa i përket sigurimit motorik, të dyja shoqëritë e VIG kanë performuar mirë, ku SIGMA ka patur një rritje me 9.55%, mbi mesataren e tregut, duke arritur në 2.4 miliardë lekë prime të arkëtuara, ndërsa Intersig ka shënuar një rritje me 8.38%, nën mesataren e tregut, duke arkëtuar 1.66 miliardë lekë prime për këtë kategori sigurimi, ku përfshihen TPL e brendshme, kartoni jeshil, sigurimi kufitar dhe ai KASKO. /ekofin.al
1 Comment
Suksese e mbaresi 2025