Për të mbajtur fuqinë punëtore në vend, kryesisht për punonjësit sezonalë dhe për të ndihmuar sa më shumë industrinë në rritje të turizmit, shoqatat e biznesit dhe në veçanti ato që kanë lidhje me sektorin, kanë përgatitur disa propozime për Qeverinë.
Pagesat jashtë sezonit, por dhe pagesat për sigurimet shoqërore janë disa nga masat që pritet të merren për t’u ardhur në ndihmë të punësuarve.
Jo vetëm punonjës të bareve, restoranteve, por dhe të bujtinave apo dhe hoteleve pritet të përfitojnë nga masat që do të merren për punësimet sezonale. Është kjo një kërkesë ndër vite e bizneseve në këto sektorë për të ruajtur fuqinë punëtore, sidomos atë të kualifikuar, por dhe për të mbështetur më tej sektorin e turizmit.
“Një nga zgjidhjet është dhe pagesa 4 muaj e punonjësve të turizmit sezonal me një kontratë me subjektet që duhet ta mbajnë 8 muaj hapur. Ishim në një takim me ILO-n, e cila në bashkëpunim me qeverinë është duke e përgatitur këtë gjë. Është e vetmja zgjidhje që të kesh punonjës të kualifikuar të trajnuar dhe të kesh një kohëzgjatje gjithëvjetore”, tha Zak Topuzi, kreu i shoqatës së hotelerisë.
Sipas Topuzit sezonaliteti është kthyer në një problem serioz për gjetjen e fuqisë punëtore, pasi punonjësit kërkojnë qëndrueshmëri.
Shqipërisë sipas shoqatave në sektorin e turizmit i mungojnë rreth 30 mijë punonjës në sektorin e akomodimit por dhe shërbimeve.
