Shoqata e Siguruesve të Shqipërisë ka shprehur shqetësimin e saj lidhur me situatën problematike të krijuar në disa akse rrugore të Veriut dhe Verilindjes së vendit, si pasojë e motit të keq, reshjeve të borës dhe ngricave, të cilat kanë sjellë vështirësi serioze në qarkullim, rritje të aksidenteve rrugore dhe dëme të konsiderueshme materiale.
Sipas Shoqatës, në këto kushte është e papranueshme që përgjegjësia të mbetet vetëm mbi drejtuesit e automjeteve, ndërkohë që subjektet përgjegjëse për mirëmbajtjen rrugore kanë detyrime të qarta kontraktuale dhe ligjore për pastrimin e akseve, kriposjen, vendosjen e sinjalistikës, menaxhimin e riskut dhe informimin në kohë të përdoruesve të rrugës.
Shoqata vëren me shqetësim se në disa segmente rrugore ndërhyrjet e kontraktorëve të mirëmbajtjes kanë qenë të vonuara, të pamjaftueshme ose mungojnë tërësisht, duke rritur ndjeshëm rrezikun për qytetarët, automjetet dhe sigurinë publike në përgjithësi.
Duke iu referuar praktikave të vendeve të Rajonit, Shoqata thekson se kriposja dhe trajtimi parandalues i akseve kritike duhet të jetë një standard minimal i detyrueshëm, ashtu siç zbatohet në Kosovë dhe Maqedoninë e Veriut, veçanërisht në periudhat kur paralajmërohen ngrica dhe reshje bore.
Në këtë kontekst, Shoqata nënvizon se dëmet që aktualisht mbulohen nga kompanitë e sigurimit nuk janë thjesht “pasojë e motit”, por edhe rezultat i mungesës së masave të detyrueshme të mirëmbajtjes rrugore. Për këtë arsye, sipas Shoqatës, në raste të tilla duhet të funksionojë mekanizmi i përgjegjësisë rrugore, në mënyrë që kostoja të mos i mbetet vetëm qytetarëve dhe sistemit të sigurimeve.
Shoqata e Siguruesve kërkon transparencë dhe përgjegjësi të plotë për zbatimin dhe monitorimin e kontratave të mirëmbajtjes rrugore, duke theksuar se siguria rrugore nuk mund të trajtohet si një përgjegjësi individuale e drejtuesve të automjeteve. Ajo është një përgjegjësi e përbashkët, që nis me rrugë të mirëmbajtura, të kriposura dhe të menaxhuara sipas standardeve të sigurisë.
Në përmbyllje, Shoqata shpreh gatishmërinë për bashkëpunim institucional me autoritetet përkatëse, me synimin e ndërtimit të praktikave të qarta dhe të zbatueshme për menaxhimin e riskut rrugor gjatë motit të keq, në interes të sigurisë së qytetarëve dhe stabilitetit të sistemit të sigurimeve në vend. /ekofin.al
