Shtetet e Bashkuara të Amerikës dhe Bashkimi Evropian do të mbështesin Shqipërinë kundër sulmeve kibernetike. Gjatë konferencës me temë “Sfidat e sigurisë kibernetike në Shqipëri”, ambasadoret e SHBA dhe BE, kanë garantuar mbështetje financiare me qëllim që Shqipëria të jetë e aftë te mbrojë veten ndaj sulmeve kibernetike.
“Ju nuk jeni vetëm, SHBA janë me ju. Janë 50 milionë dollarë në mbështetje kundër sulmeve kibernetike të Shqipërisë dhe ky është vetëm fillimi. Ne kemi qenë duke punuar së bashku me sektorin e mbrojtjes për të forcuar këtë sektor me 25 milionë dollarë mbështetje. Ky është fillimi i asistencës”,- u shpreh Yuri Kim.
“Ne jemi krenar që arritëm t’i sillnim këtu dhe t’i vendosnim në shërbimin tuaj. Pra nuk po japim zgjidhje të momentit, por zgjidhje dhe mbështetje afatgjatë, sepse kjo është detyrë afatgjatë për të gjithë ne. Gjithashtu ndihma jonë për përkrahjen e digjitalizimit, duke përfshirë këtu dhe sigurinë kompjuterike, shkon në shifrën e 15 milionë eurove në vitet e ardhshme dhe kjo është një detyrë, të cilën të gjithë duhet ta marrim seriozisht” ,- theksoi Hohmann.
Ambasadorja e SHBA-së në Shqipëri, Yuri Kim, theksoi se, sulmet kibernetike të Iranit në Shqipëri, aleatit tonë në NATO, janë të rrezikshme, dashakeqe dhe janë janë kërcënim për shtetin dhe popullin shqiptar, ndërsa ambasadorja e BE theksoi me tej se zbatimi i strategjisë për sigurinë kibernetike është shumë i rëndësishëm, sepse aty përmbahen elementët kryesorë të gjërave që duhen bërë. AKSHI gjithashtu duhet të përmirësojë kapacitetet e veta gjithashtu, të përmirësojë rolet e veta për mbikëqyrjen e fushës kompjuterike.
Shqipëria u përball me sulme kibernetike ne korrik të këtij viti që lamë pas.
