8.3 miliardë lekë ose rreth 83 milionë euro rezulton të jetë fitimi i sektorit bankar në 3-mujorin e parë të vitit 2025, në rënie me rreth 15.1%, ose 1.48 miliardë lekë, krahasuar me të njëjtin 3-mujor të vitit të kaluar. Krahasuar me 3-mujorin paraardhës, që rezulton i fundit i vitit 2024, ka një përmirësim të fitim të sektorit bankar, me 324 milionë lekë, ose 3.9% më shumë.
Referuar të dhënave të publikuara nga Shoqata Shqiptare e Bankave (AAB), Banka Kombëtare Tregtare vijon të jetë banka me fitimet më të mëdha në tregun bankar, me afro 25% të fitimeve të të gjithë sektorit. Këto fitime vijnë kryesisht si pasojë e vlerës së lartë të aseteve të kësaj banke, të investuara kryesisht në bono thesari të Qeverisë. Në 3-mujorin e parë, BKT ka fituar 2.3 miliardë lekë.
Në vend të dytë është banka e tretë më e madhe për vlerë asetesh, Raiffeisen Bank, e cila ka gjeneruar 2 miliardë lekë fitim në 3-mujorin e parë, por me një portofol shumë më të balancuar, mes portofolit të kredive dhe atij të investimeve në Bono thesari, respektivisht 133 miliardë lekë kredi dhe afro 107 miliardë lekë investime në titujt e Qeverisë.
Në vend të tretë sa i përket fitimeve të sektorit bankar qëndron OTP Bank Albania, e cila ka përfituar 1.16 miliardë lekë fitime në 3-mujorin e tretë 2025. OTP, ndryshe nga BKT, është një bankë shumë më e orientuar në kreditim, sesa në investime në titujt e Qeverisë Shqiptare, ku në fund të marsit 2025 rezulton me një portofol kredie prej 110 miliardë lekë, përkundrej rreth 40 miliardë lekëve të investuara në Bono Thesari. Në këtë mënyrë, OTP ka konsoliduar pozitat si banka e tretë më e madhe në vend sa i përket kreditimit, pas Credins dhe Raiffeisen.
Në vend të katërt sa i përket fitimeve renditet Intesa Sanpaolo Bank Albania, me rreth 758 milionë lekë fitime në 3-mujorin e parë 2025, ndjekur nga Tirana Banka me 666 milionë lekë fitime për periudhën. Më tej në renditje ndjekin ABI, Credins, Union Bank, Fibank, ndërkohë që Procredit e ka mbyllur 3-mujorin me vetëm 2.2 milionë lekë fitim, ndërsa UBA Bank është e vetmja që ka dalë me humbje, në vlerën e 198 milionë lekëve për 3-mujorin e parë. /ekofin.al
