Rruga kryesore pa shumë njerëz, rrugicat që nuk janë të mbushura me vizitorë; këto janë pamje të pazakonta gjatë muajve të verës në kryeqytetin e Santorinit, Fira.
Për herë të parë që nga pandemia e COVID-19, Santorini, një nga ishujt më të njohur grekë, po përjeton një rënie të numrit të turistëve. Aktiviteti sizmik në ishull më herët këtë vit pengoi shumë vizitorë ndërkombëtarë që ta zgjedhin atë për pushimet e tyre verore. Në javët e fundit, mbërritjet janë duke u rritur, por numrat janë shumë më poshtë se kulmet e viteve të mëparshme.
“Në Santorini, vendet e disponueshme në avionë kanë rënë me 26% nga fillimi i vitit deri më tani. Por treguesit që kemi në lidhje me ofertën e vendeve janë në rënie në intervalin 7%-8% për verën, kështu që presim një rezultat me humbje prej 10%-15%,” tha presidenti i Shoqatës së Ndërmarrjeve Turistike Greke (SETE), Yannis Paraschis.
Presidenti i hotelierëve të Santorinit, Antonis Pagoni, i tha Euronews se ai parashikon një rënie të mëtejshme në trafikun turistik dhe paralajmëroi se efektet do të përhapen në të gjithë ekonominë greke.
“Presidenti i SETE foli për mbërritjet në aeroport,” shtoi ai, “por unë për fat të keq do të them se mbërritjet në përgjithësi do të jenë në rënie rreth 20%-25%. Aktualisht ne po lëvizim në -25% deri -30%. Është një rënie e madhe në një destinacion si Santorini që tërheq më shumë se 3 milionë vizitorë. Ju e dini, është 10% e turizmit grek. Ne nuk jemi të sigurt nëse Greqia mund të përballojë të humbasë atë të ardhur.”
Oferta për turistët në moment të fundit
Hotelierët e ishullit po ofrojnë ulje në çmimet e dhomave për të tërhequr turistët në momentin e fundit. Pothuajse çdo ditë tre anije turistike ndalojnë në Santorini dhe mijëra vizitorë zbresin për të admiruar pamjet e ishullit.
Taksa për kroçerat, e cila më në fund do të fillojë të mblidhet nga korriku, nuk pritet të ndikojë në mbërritjet e anijeve turistike këtë vit.
Në të njëjtën kohë, kriza e kostos së jetesës që prek shumë pjesë të botës po lë gjurmën e saj edhe në Santorini. Këtë vit, vizitorët janë më të përmbajtur në shpenzimet e tyre dhe kjo mund të shihet jo vetëm në rezervimet e hoteleve por edhe në rrugicat e ishujve grekë.
Sipas pronarëve të dyqaneve, turistët këtë vit po shpenzojnë ndjeshëm më pak se vitet e mëparshme, jo vetëm për ngrënie por edhe për blerjen e suvenireve. /Përshtati nga Euronews, ekofin.al
