Moti i keq që ka përfshirë gjithë vëndin është bërë shkak për humbjën e jetës të shtetasit Arben Ivanaj në fshatin Dedaj të Malësisë së Madhe. Rrufeja ka shkaktuar flakë në banesën e tij, duke i marrë atij jetën. Viktima ka ndërruar jetë në spital pas plagëve të marra.
Shkarkesat elektrike ditën e sotme kanë sjellë probleme të mëdha në vendin tonë, sipas policisë edhe në Sarandë janë shënuar goditje nga rrufeja, konkretisht në një pallat në qytet si dhe në fshatin Metoqtë, në banesën e shtetasit J.A. Si pasojë e goditjes së rrufesë fatmirësisht janë shkaktuar vetëm dëme materiale.
Ndërkohë, moti i keq me reshje të dendura ka sjellë problematika në në disa akse rrugore. Në Tiranë, Lana ka dalë nga shtrati pas shirave të rrëmbyeshëm duke u bërë njësh me bulevardin në zonën e Pallatit me Shigjeta.
Rruga dytësore e Mulletit që shërbente për qarkullimin e mjeteve në drejtim të Elbasanit, është zhbllokuar nga forcat zjarrfikëse. Në orët e pasdites për shkak të stuhisë, pemët kishin rënë në rrugë. Degët e mëdha që kanë rënë nga pemët janë prerë dhe zhvendosur në krah të karexhatës.
Po ashtu rugët janë mbuluar nga uji edhe në qytetin e Durrsit, Gramshit, Lezhë duke sjellë problematikë në qarkullim për shkak të përmbytjes.
Por sipas informacioneve, në kapitenerinë e Portit të Durrësit, pritet shi i rrëmbyeshem në mbremje nga ora 19:00 deri në 21:00 për shkak të afrimit të masave ajrore të ftohta nga veriu.
