Rrjeti shqiptar i supermarketeve Pronatyra do të shënojë së shpejti zgjerimin e tij të parë jashtë vendit, me hapjen e dyqanit të parë në Kosovë. Lajmi u njoftua në rrjetet sociale, ku kompania konfirmoi hyrjen në tregun kosovar, ndonëse pa dhënë një datë të saktë të hapjes apo vendndodhjen e pikës së re të shitjes.
Ekspansioni në Kosovë vjen në një moment kur Pronatyra po forcon pozicionin e saj në tregun shqiptar, duke u shndërruar në një nga zinxhirët më dinamikë të produkteve ushqimore natyrale dhe të certifikuara. Rrjeti është themeluar nga dy ortakët Alban Peza dhe Nehat Rama.
Pronatyra numëron aktualisht 13 dyqane në Shqipëri, shumica në Tiranë, por edhe në Durrës dhe Vlorë. Rritja e shpejtë e rrjetit nisi në vitin 2023, vit kur u inaugurua dyqani i parë Pronatyra me linjën e produkteve të zinxhirit italian MD, një partneritet që e dalloi menjëherë markën në treg falë gamës së zgjeruar të produkteve ushqimore italiane dhe të certifikuara.
Hapja e dyqanit të parë të Pronatyra-s në Kosovë pritet të shënojë një fazë të re ambicioze për kompaninë, duke e vendosur atë si një aktor në zhvillim në tregun rajonal. Ky zgjerim shihet si një hap strategjik që do të rrisë praninë e markës në Ballkanin Perëndimor dhe do të hapë rrugën për investime të tjera në tregjet fqinje.
Me rritjen e kërkesës për produkte natyrale, cilësore dhe me origjinë të certifikuar, hyrja e Pronatyra-s në Kosovë pritet të përforcojë konkurrencën dhe zgjedhjet për konsumatorët, duke sjellë standarde të reja në tregun e shitjes me pakicë.
