Të dhënat e Bankës së Shqipërisë tregojnë se për tremujorin 2022, kredia e re për blerjen e pronave shënoi vlerën rekord të 10.6 miliardë lekëve. Rezulton se krahasuar me të njëjtën periudhë të një viti më parë, kreditimi bankar në këtë linjë është rritur me 48%. Në veçanti, muaji mars ka shënuar një rekord të ri për shumën e kredisë së re për shtëpi. Ajo ka shënuar vlerën e 4.9 miliardë lekëve, duke kaluar rekordin e mëparshëm, që ishte shënuar në qershor të vitit të kaluar.
Rritja e shpejtë e çmimeve ka bërë që individët ta shohin blerjen e një prone si investim më leverdi. Normat e ulëta historike të interesit kanë qenë gjithashtu një faktor shumë i rëndësishëm në mbështetje të tregut të pronave. Mbetet për t’u parë nëse ky trend do të vijojë edhe në muajt në vazhdim, ku është konstatuar shtrenjtim i kredisë, me rritjen e normës bazë të interesit nga Banka e Shqipërisë.
Gjithashtu, rritja e ndjeshme e çmimeve të pronave në vitet e fundit ka detyruar individët të marrin kredi në vlera edhe më të mëdha, për të përballuar blerjen e tyre. Sipas Bankës së Shqipërisë, çmimet e pronave u rritën me 9% vitin e kaluar, ndërkohë që sipas aktorëve të tregut, agjentëve imobiliarë rritja e çmimeve pritet të vazhdojë, ndikuar kjo edhe nga rritja e kostove si pasojë e materialeve të ndërtimit.
