Rritja e pagave, diktuar nga mungesa e krahut të punës, kanë sjellë rritje të mëtejshme të kostove në ndërtim për vitin 2024. Edhe pse çmimet e materialeve të ndërtimit shënuan rënie, së bashku me materialet e tjera, si elektrike apo hidrosanitare, përsëri ndërtimi si industri u bë më i kushtueshëm dhe kostot në fund faturohen te konsumatori final, blerësi i banesës.
Sipas të dhënave të publikuara nga Instituti i Statistikave (INSTAT), Indeksi i Kushtimit në Ndërtim në tremujorin e katërt të vitit 2024 arriti në vlerën 112,7, duke shënuar një rritje prej 1,2% krahasuar me të njëjtin tremujor të vitit 2023. Kjo është një ngadalësim i rritjes në krahasim me një vit më parë, kur ndryshimi vjetor ishte 4,1%.
Ndryshimet vjetore të grupit kryesor të kushtimit në ndërtim:
Në raportin e INSTAT, janë evidentuar ndryshimet vjetore të çmimeve për disa grupe kryesore, ku rritja më e madhe e çmimeve është vërejtur në grupin “Shpenzime për paga”, me një rritje prej 4,3%. Pasuar nga:
Shpenzime transporti: 2,3%, shpenzime makinerie: 2,2%, kosto të tjera: 2,0%, shpenzime energjiei: 1,7%
Nga ana tjetër, grupi i shpenzimeve materiale ka shënuar një ulje prej 0,8%, duke reflektuar një stabilizim në çmimet e materialeve të ndërtimit. Në veçanti, indeksi i nëngrupit “Materiale elektrike dhe komunikimi” pati uljen më të madhe prej 1,5%, pasuar nga:
Materiale ndërtimi dhe materiale hidro-sanitare dhe ventilimi, me ulje prej 0,7% secila.
Ndryshimet tremujore të grupit kryesor të kushtimit në ndërtim:
Në krahasim me tremujorin e tretë të vitit 2024, Indeksi i Kushtimit në Ndërtim shënoi një rritje prej 0,3%. Kjo rritje më e madhe e çmimeve u vu re në grupin “Shpenzime për paga”, me 2,0%, pasuar nga:
Kosto të tjera: 0,9%, shpenzime makinerie: 0,8%, shpenzime transporti: 0,2%, ndërkohë, grupi “Shpenzime materiale” ka shënuar një ulje prej 0,2%, ku:
Materiale elektrike dhe komunikimi u ul me 0,8%, materiale hidro-sanitare dhe ventilimi u ulën me 0,2%, materiale ndërtimi pati një ulje prej 0,1%./Ekofin.al
