Paga mesatare mujore bruto për një të punësuar me pagë, gjatë tremujorit të parë 2022, është 59.242 lekë, duke u rritur me 5,8 %, krahasuar me të njëjtin tremujor të vitit të kaluar.
Sipas raportit të publikuar sot nga INSTAT-i, gjatë tremujorit të parë 2022, paga mesatare mujore bruto për një të punësuar me pagë në sektorin e aktiviteteve financiare dhe të sigurimit është 93 % më e lartë sesa mesatarja në nivel kombëtar, ndërsa në grup aktivitetin e bujqësi, pyjeve dhe peshkimit është 35,1 % më e ulët.
Krahasuar me të njëjtin tremujor të vitit të kaluar, gjatë tremujorit të parë 2022 paga mesatare bruto për grup aktivitetin e informacionit dhe komunikacionit, ka rritjen më të madhe prej 25,8 %, ndërsa rritjen më të vogël e kanë pagat në aktivitetet kulturore, prej 2,7 %.
Gjatë tremujorit të parë 2022, paga mesatare mujore bruto, për një të punësuar në grup profesionin e “menaxherë, ligjvënës, nëpunës të lartë të administratës shtetërore dhe drejtorë ekzekutivë” është 73,6 % më e lartë sesa mesatarja në nivel kombëtar, ndërsa në grupin “punëtorë të profesioneve elementare” është 37,8 % më e ulët.
Krahasuar me të njëjtin tremujor të vitit të kaluar, gjatë tremujorit të parë 2022, paga mesatare mujore bruto për grup-profesionin e “punonjës të montimit dhe përdorimit të makinerive dhe pajisjeve” ka rritjen më të madhe prej 9,7 %, ndërsa rritjen më të vogël e ka grup-profesioni i specialistëve me arsim të lartë prej 4,2 %.
