Industria nxjerrëse vijoi edhe në tremujorin e parë të këtij viti të jetë një ndër aktivitetet me flukset më të mëdha të investimeve të huaja direkte.
Banka e Shqipërisë bën të ditur se, investimet e huaja në industrinë nxjerrëse shënuan një total prej 39 milionë eurosh, në 3- mujorin e parë 2022, shifër kjo me rritje të lehtë krahasuar me të njëjtin tremujor të vitit 2021.
Flukset në këtë sektor konsistojnë kryesisht në fitime të riinvestuara të kompanive ekzistuese në aktivitetin e nxjerrjes së naftës bruto.
Rritja e fortë e çmimeve të naftës bruto në tregjet ndërkombëtare këtë vit duket se ka nxitur edhe shtimin e investimeve të huaja në nxjerrjen e naftës në Shqipëri.
Shqipëria vlerësohet si një nga vendet më të pasura të Evropës në rezervat hidrokarbure dhe kompania SHELL, është së fundi një tjetër investim madhor në fushën e naftës në vendin tonë.
