Banka e Shqipërisë bën të ditur se, norma mesatare e interesit të depozitave me afat, për të gjitha maturitetet, për muajin prill u rrit në 0.9%, nga 0.7% që kishte një muaj më parë.
Rritja e normave të interesit gjatë muajit prill vjen pas vendimit të Këshillit Mbikëqyrës të Bankës së Shqipërisë për të rritur normën bazë të interesit, nga minimum historik prej 0.5% në 1%.
Rritja e interesit mesatar të depozitave me afat në lekë mund të interpretohet si një sinjal i reflektimit të lëvizjes nga Banka Qendore që tashmë po përcillen edhe në tregun primar të titujve qeveritarë, sidomos tek Obligacionet, por edhe te Bonot.
Totali i kursimeve në banka arriti në vlerën 1.23 trilionë lekë, në fund të muajit prill ose gati 10 miliardë euro.
Krahasuar me muajin mars 2022, kursimet janë rritur me 873 milionë lekë ose 0.07 %, në muajin prill.
