Administrata Tatimore ka vënë në dispozicion një shërbim të ri informues online që u mundëson individëve të verifikojnë nëse përfitojnë rimbursim për fëmijët në ngarkim nën moshën 18 vjeç dhe për shpenzimet arsimore. Ky shërbim është i aksesueshëm në faqen zyrtare të institucionit dhe synon të lehtësojë procesin e informimit për qytetarët përpara dorëzimit të deklaratës vjetore të të ardhurave personale.
Përmes këtij instrumenti digjital, individët mund të kryejnë një verifikim paraprak në mënyrë të shpejtë dhe të thjeshtë për të kuptuar nëse plotësojnë kushtet për përfitimin e rimbursimit. Shërbimi funksionon përmes një pyetësori të shkurtër, i cili kërkon të dhëna bazë si niveli i të ardhurave, numri i fëmijëve në ngarkim dhe shpenzimet arsimore të kryera gjatë vitit. Në bazë të këtyre informacionëve, sistemi jep menjëherë një përgjigje orientuese mbi mundësinë e përfitimit.
Administrata Tatimore thekson se përdorimi i këtij shërbimi është i thjeshtë dhe i hapur për të gjithë qytetarët, pasi nuk kërkon identifikim me emër përdoruesi apo fjalëkalim dhe nuk përpunon të dhëna konfidenciale. Qëllimi i tij është të ndihmojë individët të orientohen përpara se të kryejnë deklarimin zyrtar të të ardhurave.
Personat që rezultojnë se plotësojnë kushtet për përfitim mund të aplikojnë për rimbursim përmes deklarimit vjetor të të ardhurave personale, përmes formularit DIVA 2025. Afati për dorëzimin e deklaratës është deri më 31 mars 2026.
Shërbimi online për verifikimin paraprak të rimbursimit mund të aksesohet në faqen zyrtare të Administratës Tatimore në këtë link:
https://www.tatime.gov.al/c/3/10/664/rimbursimi
Ky instrument synon të rrisë transparencën dhe të lehtësojë aksesin e qytetarëve në informacion, duke i ndihmuar ata të kuptojnë më qartë të drejtat që kanë në lidhje me rimbursimet nga sistemi tatimor. /ekofin.al
