“TikTok” rikthehet në përdorim normal në Shqipëri, pa patur nevojë të VPN-ve, pas më shumë se tre muajsh nga vendimi i qeverisë për ta ndaluar për një periudhë njëvjeçare.
Vetë përdoruesit kanë raportuar në rrjetet sociale se platforma funksionon sot pa asnjë pengesë. Rihapja ka ardhur papritur, pa një vendim të paktën të komunikuar zyrtarisht nga autoritetet.
Vendimi për mbylljen e përkohshme të TikTok u mor nga Këshilli i Ministrave më 6 mars 2025, nisur edhe nga ngjarja e vrasjes së një adoleshenti në shkollën Fan Noli në kryeqytet.
Në atë periudhë pati debate në lidhje me mbylljen e TikTok, por qeveria argumentoi se kishte zhvilluar një fushatë konsultimesh me prindërit dhe shumica e tyre ishin për mbylljen e platformës. Gjithashtu autoritetet komunikuan edhe me vetë drejtuesit e TikTok dhe u deklarua se ajo nuk do të rihapej pa plotësuar disa filtra sigurie dhe mbrojtjeje.
