Banka digjitale Revolut njoftoi se ka kaluar shifrën e 4 milionë klientëve në Itali, duke u renditur mes pesë bankave të para në vend për numër klientësh, pasi më parë ishte pozicionuar edhe si banka e huaj numër një që operon në Itali. Ky hap i ri vjen pas njoftimit për arritjen e 3 milionë klientëve në janar.
Një rol kyç në këtë rritje ka pasur lançimi i fundit i Iban-eve italiane, që thjeshtojnë transaksionet e përditshme, mundësojnë marrjen e pagës në llogarinë Revolut dhe pagesën e faturave apo debitimeve direkte pa pengesa – të gjitha nën mbikëqyrjen e autoritetit rregullator italian.
Interesi në rritje
«Interesi i italianëve për Revolut po rritet ndjeshëm. Sot, 4 italianë në minutë bëhen klientë tanë, gjë që tregon se ofrojmë një produkt të përshtatur për tregun dhe që marka jonë vlerësohet realisht. Me gati 1 italian në 10 tashmë klient të Revolut, synojmë të hyjmë mes tre bankave të para për numër klientësh deri në vitin 2026», tha Zunzunegui.
«Arsyet e suksesit të Revolut në Itali duhen kërkuar te një produkt i fuqishëm, që shkon përtej bankingut tradicional dhe i përgjigjet realisht nevojave të klientëve, si edhe te një brand që emocionon dhe ndan vizionin e vlerat me publikun e vet».
Numri i klientëve që marrin pagën në llogarinë Revolut është rritur me 62% që nga nëntori, kur përdorej ende Iban-i lituanez. Ndërkohë, përdoruesit që e rimbushin llogarinë me të paktën 1.000 euro në muaj janë rritur me 630% nga nëntori.
Çfarë po ndodh me Iban-in?
«Po shohim një efekt të qartë “Iban” në mënyrën se si klientët përdorin Revolut», shton Nicola Vicino, General Manager i Revolut Bank Italia. «Nga njëra anë, më shumë klientë kanë zgjedhur të marrin pagën në Revolut pas prezantimit të Iban-it italian; nga ana tjetër, edhe ata që marrin pagën diku tjetër preferojnë ta përdorin Revolut për shpenzimet e përditshme. Kjo tregon se përvoja që ofrojmë vlerësohet dhe se njerëzit na besojnë».
Që nga janari, Revolut ka nisur migrimin nga Iban-i lituanez në atë italian, për ata që jepnin pëlqimin pas njoftimit në aplikacion. Megjithatë, disa grupe klientësh ende nuk e kanë marrë, ose po e marrin këto ditë, për shkak të funksioneve të veçanta të llogarisë ose kërkesës për të përditësuar diçka.
P.sh., ata që kishin llogari të përbashkët nuk mund të migronin deri tani, por Revolut sapo ka mundësuar këtë opsion. Nëse aplikacioni nuk është i përditësuar ose ka saldo negative, përdoruesi nuk merr njoftimin për migrim. Mjafton një update i aplikacionit ose shtim fondesh. Në raste të tjera, migrimi dështon për shkak të mungesës së dokumenteve ose informacionit. Revolut konfirmon gjithashtu se për llogaritë Revolut Pro dhe ato për të miturit, po punohet për të eliminuar vonesat.
Nisma të tjera
Aplikacioni është pasuruar së fundmi me funksione inovative si: eSIM për të qëndruar gjithmonë të lidhur gjatë udhëtimeve, Duo për menaxhimin më të mirë të përfitimeve financiare në planet me pagesë, si edhe programi i besnikërisë RevPoints, që shpërblen klientët me milje ajrore e zbritje në eksperienca dhe akomodime (zbatohen kushtet e RevPoints, Stays & Experiences).
Së shpejti, Italia do të ketë bankomatët Revolut të gjeneratës së re, të prezantuar fillimisht në Spanjë. Ndërkohë, llogaria e kursimit “Conto Deposito senza Vincoli”, me interes deri në 2,50% të paguar çdo ditë, ka arritur mbi 100.000 hapje llogarish që prej janarit. Vitin e kaluar, kompania nisi edhe POS-et për tregtarët.
Partneritetete
Në nivel global, Revolut ka nënshkruar një partneritet me Audi, që do të sjellë iniciativa për fansat e Formula 1 duke nisur nga 2026. Në Itali, marrëveshja me Como 1907 synon të forcojë lidhjet me komunitetin futbollistik./Përshtati nga Corriere della Sera, ekofin.al
