Raporti i publikuar së fundi nga Banka Botërore, vëren se, fluksi i remitancave ka qenë lehtësim për buxhetin e shumë familjeve gjatë krizës së shkaktuar nga COVID-19.
“Të ardhura nga emigrantët, ose siç njihen ndryshe remitancat, janë aktualisht burimi më i madh i financimit të jashtëm në Europë dhe Azi Qendrore, i barabartë ose më i madh se shuma e investimeve të jashtme direkte, portofolit të investimeve dhe asistencës së zhvillimit në vitet 2020 dhe 2021”, thuhet në raportin e BB-së.
Në Shqipëri, remitancat përbëjnë mbi 10% të Prodhimit të Brendshëm Bruto, e për rrjedhojë analizat e detajuara të impaktit të tyre në jetën ekonomike janë thelbësore.
Referuar statistikave të Bankës së Shqipërisë, remitancat janë një burim i rëndësishëm i të ardhurave duke përbërë mesatarisht 34% të totalit të të ardhurave mujore të familjes.
Në tremujorin e dytë të këtij viti, remitancat u rritën me bazë vjetore 10.3 %, nga 8.3 % që shënuan një tremujor më parë.
Ndërkohë që, gjatë gjysmës së parë të vitit 2020, kur goditja e pandemisë ishte më e fortë, remitancat u pakësuan ndjeshëm, megjithatë, gjatë gjysmës së dytë të 2020, ato pësuan një rritje të shpejtë në terma vjetorë 9.2 %, e cila po vijon edhe gjatë tremujorit të tretë të vitit 2021.
