Autoriteti i Komunikimeve Elektronike dhe Postare (AKEP) ka miratuar rregulloren e re për zbatimin e Regjimit të Autorizimit të Përgjithshëm, duke shfuqizuar zyrtarisht rregulloren e vitit 2017 dhe duke sjellë një ndryshim të thellë në mënyrën se si rregullohet tregu i komunikimeve elektronike në Shqipëri.
Rregullorja e re mbështetet në ligjin nr. 54/2024 “Për komunikimet elektronike”, i cili ka përafruar kuadrin shqiptar me Kodin Evropian të Komunikimeve Elektronike (EECC), duke reflektuar zhvillimet e fundit në tregun digjital dhe nevojën për një rregullim më modern dhe funksional.
Ndryshe nga rregullorja e mëparshme, e cila kishte një qasje kryesisht formale ndaj regjistrimit të operatorëve, kuadri i ri vendos një regjim funksional autorizimi, ku theksi vihet te transparenca, kapacitetet reale operacionale, siguria e rrjeteve, si dhe mbrojtja e përdoruesve dhe e të dhënave personale.
Një nga ndryshimet kryesore është kalimi i plotë drejt njoftimit elektronik përmes sistemit online të AKEP, duke reduktuar ndjeshëm procedurat fizike dhe duke rritur gjurmueshmërinë administrative. Në këtë kuadër, për herë të parë futet edhe Certifikata e Konfirmimit, një dokument zyrtar që provon regjistrimin e operatorit dhe përcakton qartë rrjetet dhe shërbimet e autorizuara, shtrirjen gjeografike dhe kushtet e zbatueshme.
Rregullorja e re sjell gjithashtu një zgjerim të listës së shërbimeve që mund të ofrohen nën këtë regjim, duke përfshirë për herë të parë shërbimet M2M, shërbimet e rishitjes, aksesin në internet, linjat me qira, rrjetet e emergjencës, si dhe rrjetet satelitore dhe hibride. Ky klasifikim e afron më tej tregun shqiptar me zhvillimet e fundit në fushën e IoT dhe broadband-it.
Në përputhje me standardet e Bashkimit Evropian, rregullorja përjashton shprehimisht nga autorizimi shërbimet e komunikimit ndërpersonal të pavarura nga numrat, si platformat OTT, duke sqaruar kufijtë mes telekomunikacionit tradicional dhe shërbimeve digjitale globale.
Një tjetër element i rëndësishëm është vendosja e kritereve më të detajuara për kapacitetet e operatorëve, përfshirë staf teknik të kualifikuar, strukturë organizative funksionale dhe plane sigurie për rrjetet, me synimin për të garantuar që në treg të operojnë subjekte reale dhe të qëndrueshme.
AKEP do të krijojë gjithashtu një bazë elektronike publike, ku do të publikohen të dhënat kryesore për operatorët dhe shërbimet e tyre, duke rritur transparencën për konsumatorët dhe investitorët.
Ndërkohë, rregullorja parashikon një periudhë kalimtare, ku të gjithë operatorët ekzistues duhet të ri-njoftojnë brenda 3 muajve për t’u pajisur me Certifikatën e re të Konfirmimit, çka pritet të sjellë një “pastrim” të regjistrit aktual. /ekofin.al
