Përfaqësuesit e mikrofinancës kanë reaguar ndaj shqetësimit të ngritur në fundjavë nga Presidenti i Republikës, për nevojën e mbrojtjes së qytetarëve që janë debitorë në subjektet financiare jobanka.
Në reagimin e saj, Shoqata Mikrofinanca Shqiptare (AMA) shprehet se të gjitha subjektet anëtare nuk adoptojnë dhe as ndjekin praktika të kundraligjshme apo jo etike në veprimtarinë e tyre.
“Çdo anëtar i kësaj Shoqate vepron në përputhje me kuadrin legjislativ dhe rregullator në fuqi, i konfirmuar nga licencimi dhe mbikëqyrja periodike e Bankës së Shqipërisë dhe çdo shmangie nga ky kuadër adresohet me masa të posaçme ligjore ose administrative.
Shoqata Mikrofinanca Shqiptare dhe Anëtarët e saj distancohen me forcë nga ato shoqëri të mbledhjes së kredive, të cilat operojnë nëpërmjet praktikave jo ligjore, jo etike, korruptive.
Institucionet e mikrokredisë mbajnë të njëjtën licencë veprimtarie me shoqëritë e mbledhjes së borxhit, por duhet të kuptohet nga tregu që aktiviteti i tyre nuk është i njëjtë.
Veprimtaria e Anëtarëve të Shoqatës së Mikrofinancës Shqiptare konsiston në kreditimin e individëve dhe bizneseve dhe këto institucione nuk blejnë kredi të këqija nga asnjë bankë apo institucion tjetër kredidhënieje. Ndaj, shqetësimet e ngritura nga ana e Presidentit apo instancave të tjera ligjvënëse apo ligjzbatuese, duhet të adresohen specifikisht tek ato institucione të cilat merren me administrimin dhe mbledhjen e borxheve të këqija, dhe jo tek institucionet financiare jo banka në përgjithësi,” thuhet në reagimin e Shoqatës.
Sipas shoqatës që mbledh shumicën e kompanive të mikrofinancës në vend, kredidhënia nga të gjithë Anëtaret e Shoqatës kryhet në përputhje me kapacitetin ripagues dhe prirjen e çdo kredimarrësi për të zbatuar detyrimet kontraktuale.
Shoqata Mikrofinanca Shqiptare dhe Anëtarët e saj shprehen të vendosur të intensifikojnë përpjekjet e tyre në drejtim të edukimit financiar, përfshirjes financiare, ndihmës të shtresave në nevojë, eliminimin e hendekut gjinor në sipërmarrje dhe krijimin e vendeve të punës nëpërmjet sipërmarrjes, dhe do vijojnë të mbështesin ekonominë shqiptare nëpërmjet standardeve më të larta të ushtrimit të veprimtarisë së tyre.
“Në të njëjtën kohë, shprehim gatishmërinë tonë si aktorë aktivë në tregun e kredidhënies, që të bashkëpunojmë me autoritetet ligjvënëse dhe ligjzbatuese, ato qeveritare, rregullatore e mbikëqyrëse, për hartimin e një kuadri ligjor dhe rregullator sa më të plotë, i cili do të përcaktojë qartësisht proceset dhe procedurat e mbledhjes së huave dhe do të identifikojë saktësisht të gjithë aktorët e përfshirë, sipas të drejtave dhe detyrimeve, për të shmangur abuzimin, zhvatjen dhe keqpërdorimin e situatës së vështirë financiarë të qytetarëve, të cilat shkaktojnë probleme të thella ekonomiko-sociale në vend,” thuhet më tej në reagimin e AMA-s.
