Qeveria shqiptare do të dalë sërish në tregun vendas për të kërkuar borxh, me një obligacion afatgjatë, me maturim 15 vjeçar. Ministria e Financave planifikon të nxjerrë në shitje përmes obligacioneve 1 miliarde lekë. Emetimi i parë i këtij lloji u zhvillua në nëntor të vitit të kaluar, edhe si një mënyrë të për provuar tregun dhe rezultoi i sukseshëm.
Për shkak të sinjaleve pozitive dhe kërkesës së lartë, Ministrinë e Financave organizoi një ankand të rradhës në shkurt të këtij viti. Në këtë rast, nga 2 miliardë Lekë që kishte qenë shuma e shpallur e obligacioneve për shitje, në ankand u paraqitën kërkesa totale me vlerë 3.44 miliardë Lekë. Për këtë arsye, Ministria e Financave vendosi sërish të pranonte kërkesa për një shumë edhe më të lartë se ajo e shpallur, gjithsej 2.3 miliardë Lekë.
Në muajin maj, Ministria e Financave zhvilloi edhe rihapjen e dytë të ankandit të obligacioneve 15 vjeçare. Por, në këtë rast, ndikuar edhe nga efektet e krizës në Ukrainë dhe rritja e inflacionit, rezultatet ishin shumë të ndryshme. Në këtë ankand u vërejt shtrëngim i ndjeshëm të kërkesës së investitorëve dhe një rritje të fortë të normave të interesit. Yield-i mesatar i ankandit rezultoi 6.9%, në rritje të ndjeshme nga yield-i prej 5.84% i rihapjes së parë që ishte zhvilluar në muajin shkurt dhe 5.88% që kishte yield-i i ankandit të parë të këtyre obligacioneve, të zhvilluar në nëntor të vitit të kaluar.
Nga 2 miliardë Lekë që ishte vlera e obligacioneve të nxjerra në shtije nga Ministria e Financave, në ankand u paraqitën kërkesa totale në vlerën e më pak se 1.27 miliardë Lekëve. Për shkak të yield-eve të larta të kërkuara, Ministria e Financave përfundimisht vendosi të pranonte kërkesa për një shumë totale prej vetëm 785 milionë Lekësh.
