Ministria e Financave ka publikuar kalendarin e emetimeve të titujve qeveritarë për tremujorin e tretë të vitit 2026, ku parashikohet të dalin në treg instrumente borxhi me vlerë totale prej 79.5 miliardë lekësh. Krahasuar me tremujorin paraardhës, qeveria planifikon të rrisë huamarrjen në tregun e brendshëm me rreth 10.6%, ndërsa në raport me të njëjtën periudhë të një viti më parë, rritja arrin në afro 18.6%.
Sipas kalendarit për periudhën korrik-shtator 2026, emetimet bruto të titujve qeveritarë do të arrijnë në 29.5 miliardë lekë në korrik, 27.5 miliardë lekë në gusht dhe 22.5 miliardë lekë në shtator, për një total prej 79.5 miliardë lekësh. Në tremujorin e dytë të këtij viti, qeveria kishte planifikuar emetime prej 95 miliardë lekësh gjatë muajve prill-qershor, por një pjesë e konsiderueshme e tyre lidhej me emetime të reja të obligacioneve afatgjata. Duke parë strukturën e re të kalendarit, vërehet një fokus më i madh te rihapjet e obligacioneve ekzistuese dhe një ritëm më i moderuar i emetimeve të reja.
Në krahasim me tremujorin e tretë të vitit 2025, qeveria ka zgjeruar ndjeshëm programin e huamarrjes. Një vit më parë, për periudhën korrik-shtator 2025, kalendari parashikonte emetime totale prej 67.2 miliardë lekësh, ndërsa këtë vit shifra rritet në 79.5 miliardë lekë, ose 12.3 miliardë lekë më shumë.
Rritja është veçanërisht e dukshme në segmentin e obligacioneve afatmesme dhe afatgjata. Në korrik 2026 do të zhvillohen emetime të reja për obligacionet 2-vjeçare, 7-vjeçare, si dhe për obligacionet referencë 3-vjeçare dhe 5-vjeçare, me një vlerë të kombinuar prej 17 miliardë lekësh. Një vit më parë, në korrik 2025, emetimet e reja përfshinin obligacione 2, 3, 5, 7 dhe 10-vjeçare me vlerë totale 17 miliardë lekë, por me volum më të ulët të bonove të thesarit.
Ndryshim tjetër i rëndësishëm është rritja e peshës së obligacioneve 20-vjeçare dhe 15-vjeçare në kalendar. Në shtator 2026 është planifikuar rihapja e obligacionit 20-vjeçar me vlerë 1.5 miliardë lekë, ndërsa në gusht rihapja e obligacionit 15-vjeçar me 1.5 miliardë lekë. Kjo tregon se Ministria e Financave vijon strategjinë për të zgjatur maturitetin mesatar të borxhit publik dhe për të siguruar financim afatgjatë në tregun vendas.
Edhe bonot e thesarit mbeten një komponent i rëndësishëm i financimit. Gjatë tremujorit të tretë 2026 janë planifikuar emetime të bonove 3-mujore, 6-mujore dhe 12-mujore me vlerë totale 31.5 miliardë lekë. Krahasuar me vitin e kaluar, kur dominonin pothuajse ekskluzivisht bonot 12-mujore, kalendari i ri tregon një diversifikim më të madh të instrumenteve afatshkurtra.
Paralelisht me emetimet e reja, Ministria e Financave ka parashikuar edhe dy operacione “buyback”, ose blerje të parakohshme të titujve ekzistues, me vlerë nga 1 miliard lekë secila në muajt gusht dhe shtator. Këto operacione synojnë menaxhimin më efikas të profilit të maturimeve dhe uljen e presionit të rifinancimit në periudhat e ardhshme./ekofin.al
