Qeveria ka miratuar në mbledhjen e sotme vendimin për përcaktimin e rregullave për shfrytëzimin e strukturave akomoduese dhe të nivelit minimal të kapacitetit të shfrytëzimit të tyre, në funksion të deklarimit për qëllime tatimore, gjatë vitit kalendarik.
Si periudhë e shfrytëzimit njihet periudha e ndarë në dy periudha sezonale, përkatësisht, nga data 1 maj deri në datën 30 shtator dhe nga data 1 tetor deri në datën 30 prill të çdo viti. Në përllogaritjet, për efekt të kapacitetit të shfrytëzimit, ditët që merren në konsideratë janë ditët kalendarike gjatë kësaj periudhe.
Niveli i shfrytëzimit të strukturave akomoduese bazohet në të dhënat e deklaruara nga sipërmarrësi i strukturës akomoduese për shfrytëzimin e kapacitetit të saj. Ky nivel llogaritet duke marrë në konsideratë numrin e përgjithshëm të dhomave të shfrytëzuara përgjatë periudhës së shfrytëzimit në raport me kapacitetin e plotë të strukturës akomoduese gjatë kësaj periudhe.
Niveli minimal i shfrytëzimit të strukturës akomoduese është jo më pak se 65 % e kapacitetit të strukturës akomoduese për periudhën nga data 1 maj deri në datën 30 shtator dhe jo më pak se 30 % e kapacitetit të strukturës akomoduese për periudhën nga data 1 tetor deri në datën 30 prill.
Kjo vlerë llogaritet si mesatare e nivelit minimal të shfrytëzimit përgjatë periudhës së shfrytëzimit.
Sipërmarrësit e strukturës akomoduese zgjedhin të deklarojnë nivelin e shfrytëzimit ose sipas nivelit minimal më sipër, ose një nivel të parashikuar prej tyre.
Në rastin kur tatimpaguesi zgjedh formën e deklarimit minimal, administrata tatimore, në fund të periudhës së shfrytëzimit, vlerëson deklarimin e bërë në sistemin tatimor.
Në rastet kur ky deklarim është më i vogël se niveli minimal i shfrytëzimit, administrata tatimore bën vlerësim nga zyra, duke e çuar nivelin e deklarimit në nivelin minimal të shfrytëzimit dhe në sistemin tatimor.
Në rast të zgjedhjes së deklarimit të nivelit të parashikuar prej tyre, administrata tatimore nëpërmjet strukturave të saj verifikon në terren ose nga zyra respektimin e deklarimit të kapaciteteve të shfrytëzuara dhe në rastet kur këto kapacitete të shfrytëzuara janë të pasakta dhe joreale, atëherë administrata tatimore zbaton metodat alternative të vlerësimit për përcaktimin e detyrimeve tatimore, sipas legjislacionit përkatës.
Sipërmarrësi, për strukturat akomoduese nga bujtinat te resortet duhet të deklarojë pranë Ministrisë së Turizmit brenda muajit janar të çdo viti, kapacitetin e shfrytëzimit dhe nivelin e shfrytëzimit të strukturës akomoduese.
Në rastet kur ka ndryshime të kapacitetit të strukturës akomoduese, sipërmarrësi ka detyrimin të deklarojë ndryshimet e kapacitetit të strukturës akomoduese, brenda 15 ditëve kalendarike nga data e ndryshimit të kapacitetit të strukturës.
Zgjedhja e një prej formave të nivelit të deklarimit të shfrytëzimit nuk mund të ndryshohet brenda vitit kalendarik.
Përjashtimisht, për vitin 2025, deklarimi i sipërmarrësit pranë ministrisë përgjegjëse për turizmin bëhet brenda 30 (tridhjetë) ditëve nga momenti i hyrjes në fuqi të këtij vendimi dhe ministria përgjegjëse për turizmin u dërgon Drejtorisë së Përgjithshme të Tatimeve dhe njësisë së qeverisjes vendore, që administron territorin ku ndodhet struktura akomoduese, të dhënat e deklaruara nga sipërmarrësi brenda 30 (tridhjetë) ditëve nga përfundimi i afatit të deklarimit nga sipërmarrësi.
Ky vendim do të hyjë në fuqi pas botimit në “Fletoren zyrtare”. /ekofin.al
