Këshillit të Ministrave ka miratuar në mbledhjen e sotme vendimin që parashikon kompensimin financiar të pronarëve të pasurive të paluajtshme private, të cilëve u janë zënë sipërfaqe nga ndërtime të legalizuara në disa zona të vendit, përfshirë Tiranën, Durrësin, Vlorën, Elbasanin, Lezhën, Fierin, Shkodrën dhe qarqe të tjera.
Në total, parashikohet një fond kompensimi prej mbi 1.08 miliardë lekësh për një sipërfaqe prej më shumë se 101 mijë metra katrorë, sipas listës përkatëse të përfshirë në shtojcën zyrtare të vendimit.
Për një pjesë të caktuar të pasurive, fondi i kompensimit do të vihet në dispozicion nga Agjencia e Trajtimit të Pronave, ndërsa burim financiar do të shërbejnë edhe të ardhurat nga shitja e parcelave ndërtimore në proceset e legalizimit.
Vendimi ngarkon Agjencinë Shtetërore të Kadastrës dhe strukturat e saj vendore me detyrën për të pasqyruar ndryshimet në regjistrat e pronësisë dhe për të zbatuar procedurat përkatëse.
Ai hyn në fuqi menjëherë pas botimit në “Fletoren Zyrtare”, duke synuar të përshpejtojë zgjidhjen e një prej problematikave më të ndjeshme të pronësisë në vend.
V E N D I M
PËR
KOMPENSIMIN FINANCIAR TË PRONARËVE TË PASURIVE TË PALUAJTSHME QË PREKEN NGA NDËRTIMET E LEGALIZUARA
Në mbështetje të nenit 100 të Kushtetutës dhe të nenit 24, të ligjit nr.20/2020, “Për përfundimin e proceseve kalimtare të pronësisë në Republikën e Shqipërisë”, me propozimin e Kryeministrit, Këshilli i Ministrave
V E N D O S I:
1. Kompensimin financiar të pronarëve të pasurive të paluajtshme, pronë private, për sipërfaqet takuese, të zëna nga ndërtimet e legalizuara në drejtoritë vendore të Agjencisë Shtetërore të Kadastrës: Tiranë Rurale 1, Tiranë Rurale 2, Kamzë-Vorë, Durrës-Kavajë-Krujë, Tiranë Veri, Tiranë Jug, Vlorë, Elbasan, Lezhë, Dibër, Zonat e Stimuluara, Fier dhe Shkodër.
2. Vlera e përgjithshme e kompensimit financiar është 1 089 383 502,2 (një miliard e tetëdhjetë e nëntë milionë e treqind e tetëdhjetë e tre mijë e pesëqind e dy presje dy) lekë, për sipërfaqen 101 752,1 (njëqind e një mijë e shtatëqind e pesëdhjetë e dy presje një) m², sipas shtojcës nr.1, që i bashkëlidhet këtij vendimi dhe është pjesë përbërëse e tij.
3. Për kompensimin financiar të pronarëve të pasurive të paluajtshme që preken nga ndërtimet e legalizuara, sipas shtojcës nr.1, që i bashkëlidhet këtij vendimi, për pasuritë me numrat rendorë, sipas kolonës nr.14, të shtojcës nr.1, përkatësisht: nr.10, nr.11, nr.18, nr.19, nr.24, nr.28, nr.38, nr.39, nr.43, nr.47, nr.49, nr.50, nr.52, nr.53, nr.56, nr.57, nr.62, nr.63, nr.75, nr.80, nr.83, nr.84, nr.85, nr.87, nr.104, nr.112, nr.125, nr.128, nr.132, nr.135, nr.138, nr.148, nr.152, nr.155, nr.156, nr.159, nr.168, nr.169, nr.170, nr.171, nr.172, nr.188, nr.201, nr.212, nr.219, nr.221, nr.222, nr.223, nr.248, nr.259, nr.269, nr.276, nr.282, nr.294, nr.295, nr.299, nr.304, nr.313, nr.321, nr.322, nr.379, nr.403, nr.408, nr.413, nr.418, nr.419, nr.426, nr.427, nr.428, nr.430, nr.432, nr.433, nr.436, sipas seksionit të veçantë (kolona 19), të shtojcës nr.1, shuma e kompensimit financiar vihet në dispozicion nga Agjencia e Trajtimit të Pronave, sipas pikave 3 dhe 4, të nenit 24, të ligjit nr.20/2020, “Për përfundimin e proceseve kalimtare të pronësisë në Republikën e Shqipërisë”.
4. Të ardhurat, që arkëtohen nga drejtoritë vendore të Agjencisë Shtetërore të Kadastrës, si rrjedhojë e kalimit të pronësisë nëpërmjet shitjes së parcelës ndërtimore, si për pasuritë shtetërore edhe për pasuritë e të tretëve, në favor të objekteve informale që legalizohen, përdoren për kompensimin e pronarëve.
5. Drejtoritë vendore të Agjencisë Shtetërore të Kadastrës: Tiranë Rurale 1, Tiranë Rurale 2, Kamzë-Vorë, Durrës-Kavajë-Krujë, Tiranë Veri, Tiranë Jug, Vlorë, Elbasan, Lezhë, Dibër, Zonat e Stimuluara, Fier dhe Shkodër kryejnë ndryshimet përkatëse për këto pasuri në regjistrat e pasurive të paluajtshme.
6. Ngarkohen Agjencia Shtetërore e Kadastrës dhe Agjencia e Trajtimit të Pronave për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
