Qeveria miratoi në mbledhjen e datës 16 korrik disa ndryshime në vendimin “Për procedurat, kriteret dhe rregullat për zbatimin e programit të nxitjes nëpërmjet vetëpunësimit”.
Skema ekzistuese synon të ndihmojë punëkërkuesit e papunë të kthehen në sipërmarrës të pavarur dhe ndryshimi kryesor lidhet me dyfishimin e subvencionimit, i cili përfitohet sipas disa kushteve të përcaktuara dhe për një aplikantët e përzgjedhur.
Programi parashikon subvencion për të gjithë të përzgjedhurit si përfitues granti për ngritjen e biznesit deri në masën 1 milion lekë tashmë, nga 500 mijë lekë që ishte më parë.
Për të aplikuar në këtë program, aplikuesi duhet të plotësojë kriteret e mëposhtme: është punëkërkues i papunë i regjistruar në strukturën vendore të punësimit; ka një ide biznesi, e cila nuk është në kundërshtim me kriteret e konkurrueshmërisë, të përcaktuara në dispozitat e Kodit të Punës dhe që deklarohet në bazë të një formulari të posaçëm, i cili përmban: i. përshkrimin e idesë së biznesit; relevancën (rëndësinë); burimet e nevojshme për realizimin e biznesit;. vlerësimin e gjendjes së mjediseve ku do të zhvillohet biznesi. Punëkërkuesi, i cili aplikon në këtë program, duhet të marrë pjesë personalisht në të gjitha hallkat e procesit dhe mund të përfitojë vetëm një herë nga ky program.
Në këtë linjë, është shtuar një kriter i ri: punëkërkuesit nuk duhet të kenë përfituar më parë nga programe të tilla në 5 vitet e fundit, duke siguruar që ndihma të mos përqendrohet në të njëjtët individë.
Një tjetër ndryshim është rritja e fleksibilitetit për aplikantët: afati për regjistrimin e biznesit pas përzgjedhjes është dyfishuar, nga 5 në 10 ditë pune, ndërsa kompensimi për vlerësimin e planeve të biznesit është rritur nga 3 mijë në 5 mijë lekë.
Megjithatë, granti nuk mund të përdoret për të gjitha shpenzimet. Blerja e pasurive të paluajtshme, qiratë dhe pagat nuk do të mbulohen. Fokusi do të jetë vetëm te shpenzimet që ndihmojnë konkretisht ngritjen e një biznesi funksional dhe të ligjshëm.
Financimi bëhet në këto faza:
Me nënshkrimin e kontratës, përfituesit i transferohen si paradhënie në llogarinë e biznesit 20% e vlerës së grantit, shumë të cilën përfituesi duhet ta justifikojë me fatura të rregullta tatimore dhe vërtetim të kryerjes së pagesave, si kusht për financimin e pjesës së mbetur të grantit;
Vlera e mbetur e grantit i rimbursohet deri në dy këste, të justifikuara me fatura të rregullta tatimore dhe vërtetimin e kryerjes së këtyre pagesave.
Vlera e plotë e grantit duhet të shpenzohet brenda katër muajve nga lidhja e kontratës me strukturën rajonale të punësimit;
Përfituesit nuk duhet të shkelin asnjë nga kushtet e kontratës për përfitimin e grantit dhe zbatimin e programit. Nëse përfituesit shkelin kushtet e kontratës, përfituesi është i detyruar të kthejë 100% të mbështetjes financiare të përfituar deri në atë moment.
Monitorimi i zbatimit të programit kryhet nga strukturat përkatëse të punësimit.
Në një klimë ku largimi i të rinjve është kthyer në një sfidë kombëtare, vendime të tilla synojnë të krijojnë kushte më të favorshme për zhvillimin profesional dhe ekonomik brenda vendit. /ekofin.al
