Në pak më shumë se një dekadë, Shqipëria ka përjetuar një transformim rrënjësor në turizëm, duke u kthyer nga një vend me vetëm 1 milion vizitorë në vitin 2013, në një destinacion që sot mirëpret mbi 12 milionë turistë çdo vit. Ky bum turistik ka sjellë një rritje të jashtëzakonshme të të ardhurave, nga më pak se 1 miliard euro në gati 5 miliardë euro, duke e shndërruar turizmin në një nga motorët kryesorë të ekonomisë shqiptare dhe një burim të rëndësishëm punësimi për qytetarë në të gjithë vendin.
Sipas Programit Qeverisës 2025–2029, synimi madhor është që deri në vitin 2030, Shqipëria të konsolidohet si një destinacion turistik i nivelit të lartë në Mesdhe, me turizëm gjithëvjetor, të qëndrueshëm dhe konkurrues në tregun europian e global.
Rajonet turistike dhe infrastruktura detare
Shqipëria do të shpërndahet në 6 rajone turistike të branduara sipas strategjisë “Shqipëria Turistike 2030”, për të garantuar ofertë të diversifikuar dhe standarde ndërkombëtare.
Një projekt madhor është transformimi i Portit të Durrësit në një qendër moderne për kroçera dhe jahte luksoze, ndërsa parashikohet ndërtimi i 20 marinave të reja, nga Velipoja në veri deri në Ksamil në jug, duke e bërë vendin një destinacion lider për turizmin detar në Mesdhe.
Qeveria synon gjithashtu të dyfishojë netqëndrimet turistike, duke gjeneruar mbi 6.6 miliardë euro të ardhura vjetore deri në vitin 2030. Një rëndësi e veçantë i jepet edhe zhvillimit të turizmit malor dhe sporteve dimërore, sidomos në Alpet shqiptare dhe zonat natyrore, duke ofruar eksperienca unike për vizitorët.
Në plan është parashikuar një investim i madh për promovimin e siteve të trashëgimisë kulturore, si dhe digjitalizimin e kalendarëve kulturorë, me vizionin për ta kthyer Shqipërinë në një “muze të hapur”. Në këtë kuadër, vendi synon të konsolidohet si një pol rajonal për konferenca, panaire dhe ekspozita ndërkombëtare.
Digjitalizimi dhe teknologjia
Një ndër pikat më ambicioze është krijimi i Platformës Digjitale të Integruar të Turizmit, e cila përfshin Regjistrin kombëtar digjital të turizmit për sipërmarrjet; platformën e-Visitor për regjistrimin elektronik në kohë reale të vizitorëve; sistemin elektronik të të dhënave për statistika të sakta dhe vendimmarrje më efikase.
Programi parashikon gjitashtu në bashkëpunim me “UN Tourism”, qeveria do të themelojë Akademinë Ndërkombëtare të Turizmit dhe Mikpritjes, për të përgatitur brezin e ri të profesionistëve në këtë sektor. Gjithashtu, është parashikuar një administrim më i drejtë i plazheve, duke garantuar më shumë hapësira publike dhe qetësi për pushuesit.
Ky plan ambicioz synon të vendosë Shqipërinë në hartën e destinacioneve më konkurruese të Mesdheut, duke kombinuar potencialin natyror e kulturor me standardet moderne të shërbimit dhe menaxhimit turistik. /ekofin.al
