Pushimet në Greqi në 2025 përveç argëtimit, do të kenë edhe një kosto më të lartë. Kjo për faktin se këtë vit hyn në fuqi projektligji i miratuar nga Parlamenti Grek në dhjetor për rritjen e taksës ditore për qiranë afatshkurtër.
Ndryshimi ligjor do të prekë dhe akomodimin në hotel dhe u ngarkon vizitorëve një taksë për të përballuar ndikimin e fatkeqësive natyrore në ekonominë e Greqisë.
Për shkak të ndryshimeve klimatike, Greqia po përballet me një numër në rritje të ngjarjeve ekstreme të motit, të tilla si përmbytjet, thatësirat dhe zjarret në pyje, të cilat shtrëngojnë financat e saj publike. Turizmi është shtytësi kryesor i ekonomisë së saj, e cila doli nga kriza e borxhit në 2018.
Nga viti 2025, taksa ditore për qiratë afatshkurtra në Greqi për periudhën prill-tetor – sezoni kryesor turistik i vendit – do të rritet në 8 euro (8,41 dollarë) nga 1,5 euro.
Gjatë muajve të dimrit, taksa do të rritet në 2 euro nga 0.5 euro që është aktualisht.
“Ne synojmë të mbledhim 400 milionë euro në vit, pothuajse dyfishi i shumës që morëm vitin e kaluar”, tha një zyrtar i lartë i ministrisë së financave për Reuters.
Projektligji rrit një taksë ditore për akomodimin në hotel deri në 15 euro në muajt e verës, në varësi të vlerësimit të yjeve të hotelit. Ajo vendos gjithashtu një taksë prej 20 eurosh për mbërritjet e anijeve turistike në ishujt e njohur të Santorinit dhe Mykonos dhe një taksë prej 5 eurosh për destinacione të tjera.
Në vitin 2023, qeveria paraqiti një buxhet shtesë prej 600 milionë eurosh për të kompensuar familjet dhe bizneset dhe për të rivendosur dëmet e shkaktuara nga stuhia vdekjeprurëse Daniel në infrastrukturën hekurudhore dhe rrugore.
