Në aktin normativ për rishikimin e buxhetit 2024, që ka hyrë në fuqi pasi është publikuar menjëherë në Fletoren Zyrtare janë caktuar 120 milionë lekë për shpërblimin e punonjësve mbështetës të administratës publike.
Ky shpërblim do t’u jepet punonjësve me paga të ulëta ku përfshihen shoferët, sanitaret, punonjësit e arkivit, protokollit etj. Ende nuk është specifikuar masa e shpërbimit për këtë kategori, por mundësitë janë që të marrin një pagë shtesë.
Këtë fundvit pensionistët marrin bonus nga 100 dhe 150 euro, me një fond në total 9.8 miliardë lekë. Por në rishikimin e buxhetit, është parashikuar 6.3 mld lekë si llogari e veçantë pranë Bankës së Shqipërisë për bonusin e dytë që pensionistët do të marrin pranverën e vitit 2025 për pensionistët.
Në rishikimin e buxhetit, qeveria ka shtuar afro 1.6 miliardë lekë për pushtetin vendor për të shlyer detyrimet e prapambetura si dhe 6 bashki (Divjakë, Durrës, Gjirokastër, Pukë, Shkodër e Vlorë) do marrin fonde për “rivitalizimin e tregjeve tradicionale”.
Ky akt normativ nuk ka prekur pritshmëritë për të ardhurat dhe shpenzimet. Të ardhurat për këtë vit planifikohet të arrijnë 714 miliardë lekë, ndërsa shpenzimet në 771.3 miliardë lekë.
