Mazhoranca ka propozuar në Kuvend një nismë për faljen e gjobave për ndërtimet pa leje në zonat rurale dhe ka kërkuar miratimin e saj me procedurë të përshpejtuar. Kjo ka sjellë përplasje në seancë mes demokratëve dhe socialistëve.
Ministri i Shtetit për marrëdhëniet me Parlamentin, Taulant Balla, theksoi se procedura është bërë sipas rregullores së Kuvendit dhe se nisma është e nevojshme dhe e kërkuar nga shumë qytetarë.
“Edhe kolegë të opozitës në shumë raste kanë ngritur një shqetësim të qytetarëve, ata që na kanë dhënë nderin e madh që të jemi në këtë sallë, lidhur me disa raste apo shumë raste të penalizmit të padrejtë, duke perifrazuar edhe kolegët e opozitës, për ndërtime që kanë të bëjnë me një riparim çatie, me një mur mbajtës të një shtëpie, të një avllie, dhe në këtë kontekst deputetë të PS-së, do të ftoja dhe deputetë të PD-së që ta përmirësojnë draftin në punë e sipër që do të zhvillohet në Komision”, tha Balla.
Nga ana tjetër, kryetari i grupit parlamentar të Partisë Demokratike, Gazmend Bardhi tha se “është Gjykata Kushtetuese që iu ka thënë që ligji që keni miratuar dhe këto veprime terrori ndaj qytetarëve bien ndesh me Kushtetutën e Republikës së Shqipërisë”.
Duke folur në Kuvend lidhur me nismën e propozuar nga Partia Socialiste për një ligj për faljen e gjobave për ndërtimet pa leje në zonat rurale dhe që kërkon të kalojë me procedurë të përshpejtuar, Bardhi duke iu drejtuar ministrit të Drejtësisë, Ulsi Manja tha se “si ministër Drejtësie duhet të informosh qytetarët që gjobat nuk po ua shfuqizon, ti gjobat i ka shfuqizuar me vendimin numër 15 datë 22 .6 2022 Gjykata Kushtetuese e Republikës së Shqipërisë, e cila ka shfuqizuar shkronjën E të pikës 1 të nenit 52 të ligjit 107/2014 për “Planifikimin dhe zhvillimin e territorit në pjesën që parashikon dënim me gjobë për kryerjen e punimeve pa lejë për plotësimin e nevojave për strehim”.
Ende nuk është specifikuar se cilat do të jenë afatet për faljen e gjobave dhe sesi do të realizohet procesi. /ekofin.al
