Aviacioni civil në Shqipëri po njeh rritje të qëndrueshme, duke u kthyer në portën kryesore hyrëse për vendin dhe një shtyllë të rëndësishme të zhvillimit të turizmit.
Sipas projeksioneve të Autoritetit të Aviacionit Civil Ndërkombëtar (ICAO), deri në vitin 2040 Shqipëria pritet të arrijë një fluks prej 21,6 milionë pasagjerësh, një rritje e ndjeshme nga shifrat aktuale.
Zëvendëskryeministrja dhe ministrja e Infrastrukturës dhe Energjisë, Belinda Balluku, u shpreh se rrjeti i aeroporteve ndërkombëtare të vendit po i jep Shqipërisë një rol të ri në hartën e turizmit dhe lidhjeve ndërkombëtare.
“21,6 milionë pasagjerë nga ajri është projeksioni i ICAO për Shqipërinë në vitin 2040. Aviacioni civil po rritet vit pas viti, duke u kthyer në portën kryesore hyrëse për Shqipërinë, ndaj ka fokusin tonë kryesor. Tirana, Vlora, Kukësi dhe së shpejti edhe aeroporti i Gjirokastrës e vendosin Shqipërinë në pozita si asnjëherë më parë, duke arritur shifra rekord vizitorësh”, deklaroi Balluku.
Vetëm gjatë periudhës janar-gusht 2025, përmes Aeroportit Ndërkombëtar të Rinasit kanë kaluar mbi 7,8 milionë pasagjerë, duke shënuar një rritje prej 9% krahasuar me të njëjtën periudhë të vitit të kaluar. Në këtë interval u realizuan 42 462 fluturime, me një rritje prej 2% krahasuar me 8-mujorin e vitit 2024, ndërsa Tirana u lidh me 137 destinacione ndërkombëtare.
Me shifrat rekord të vitit të fundit, Aeroporti Ndërkombëtar i Tiranës është shndërruar në pikën ajrore më të rëndësishme të Ballkanit Perëndimor, duke kaluar për herë të parë aeroporte të vendeve fqinje si Prishtina, Beogradi, Shkupi, Podgorica apo Sarajeva. Kjo rritje e ka vendosur kryeqytetin shqiptar në qendër të hartës së transportit ajror rajonal, jo vetëm si portë kryesore e turizmit në Shqipëri, por edhe si një alternativë gjithnjë e më e preferuar për udhëtarë nga rajoni që kërkojnë lidhje më të shpejta me Europën dhe destinacionet ndërkontinentale.
