Partia Demokratike ka prezantuar programin ekonomik, që sipas kësaj force politike ofron lehtësira fiskale për bizneset dhe sipërmarrësit, si dhe mbështetje për zhvillimin e sektorëve të prodhimit, bujqësisë etj. Ky plan sipas PD, është i realizueshëm dhe ka si synim përmirësimin e kushteve të jetesës dhe zhvillimin e qëndrueshëm.
Modeli ekonomik do të bazohet dhe ndërtohet mbi 5 shtylla:
. Një ekonomi që prodhon dhe krijon vende pune.
. Një sistem fiskal të drejtë dhe taksa të ulëta.
. Një shtet që garanton barazi ekonomike dhe zhduk varfërinë ekstreme.
. Një Shqipëri që tërheq investime dhe kthen shqiptarët në atdhe.
. Një qeveri të vogël, por efikase dhe transparente.
Në programin ekonomik të Partisë Demokratike thuhet se: “Me një paketë lehtësirash fiskale dhe proceduriale për sipërmarrjet prodhuese dhe për ato që krijojnë gjithnjë e më shumë vende pune, me skema konkrete mbështetjeje të financuara apo bashkefinancuara me Bankën Zhvillimore Kombëtare që do të financojnë startup-et, sipërmarrësit e rinj dhe projektet strategjike në prodhim, industri, bujqësi dhe energji, mund të ndalim rrokullisjen e rrënimit ekonomik dhe të kthejmë prodhimin në epiqendër.
Ekonomia shqiptare nuk mund të mbijetojë vetëm me turizëm dhe remitanca. Ajo duhet të mbështetet në sektorë që krijojnë vende pune të qëndrueshme dhe të paguara mirë. Taksë e sheshtë 10% mbi të ardhurat, fitimet dhe kapitalin, në vend të taksimit progresiv.
Disa nga masat e tjera fiskale janë:
Rritje e kufirit të xhiros vjetore mbi përjashtimin nga TVSH dhe tatim fitimi për bizneset e vogla, 180 mijë euro xhiro vjetore.
Eliminim i burokracive dhe kontrolleve abuzive.
Bizneset do të kenë qartësi dhe stabilitet.
Sistemi tatimor do të vendoset në fillim të mandatit dhe nuk do të ndryshojë për 4 vjet.
Një sistem që garanton nivel minimal jetese.
Vendosja e minimumit jetik 200 euro brenda 100 ditëve të para.
Rritje reale e përvitshme e pensioneve.
Rimbursimi i TVSH-së për shportën bazë për familjet me të ardhura të ulëta.
Paketat e lindjes, paketat për fëmijët, subvencionimet e blerjes së shtëpisë, sidomos për çiftet e reja, etj.
Ngritja e katër Zonave të Lira Ekonomike, ku investitorët e huaj do të kenë lehtësira fiskale dhe logjistike
Defiskalizimi i kompanive që hapin vende pune, sidomos në IT dhe inovacion, do të kenë përjashtime tatimore nga 3 deri në 5 vite.
“Programi Kombëtar për Kthimin e Emigrantëve”, me përjashtime fiskale deri në 5 vjet për emigrantët që kthehen dhe hapin biznes në Shqipëri.
Rritja e transparencës dhe llogaridhënies në menaxhimin e financave publike.
