Fermerët dhe sipërmarrësit përmes skemave mbështetëse po rrisin investimet në teknologjitë e reja dhe modernizimin e fermave, si domosdoshmëri e avantazheve konkurruese në tregjet europiane dhe akses në tregjet e sofistikuara.
Sipërmarrës të industrisë së qumështit, diskutuan gjatë një takimi në Tiranë, për zgjerimin e eksporteve të produkteve të bulmetit “Made in Albania” drejt vendeve CEFTA-s, teksa u ndalën në “sfidat dhe mundësinë e krijimit të zonave rajonale ekonomike, për rritjen e eksporteve”.
Përfaqësues të Autoritetit Kombëtar të Ushqimit dhe Ministrisë së Bujqësisë dhe Zhvillimit Rural, organizatorë të këtij takimi me biznese të prodhimit dhe përpunimit të qumështit, u njohën me kërkesat e biznesit mbi zgjerimin e tregut, për të eksportuar drejt vendeve CEFTA-s.
Ekspertët e MBZHR theksuan se, dialogu mes palëve është kyç për të zgjidhur problematikat dhe kthyer ato në një mundësi, për aftësitë konkurruese të bizneseve prodhuese/përpunuese që janë të nevojshme për qasje në këto tregje, drejt krijimit të zonave rajonale ekonomike.
Sipas tyre rritja e standardeve të cilësisë dhe sigurisë ushqimore është faktor kryesor në nxitjen e eksporteve.
