Centrali i parë bërthamor i vogël me module, ose SMR, në Poloni do të ndërtohet në Włocławek, njoftoi të enjten kompania energjetike Orlen, duke u bërë kështu projekti i parë i këtij lloji në Evropë.
Polonia do të ndërtojë reaktorin e parë bërthamor modular të vogël BWRX-300 në Evropë, duke shënuar një hap të madh në largimin e vendit nga qymyri dhe drejt energjisë më të pastër, bëri të ditur gjiganti shtetëror i energjisë Orlen.
“Centrali i parë bërthamor i vogël BWRX-300 në Evropë do të ndërtohet në Poloni: ne po ndërtojmë energjinë e së ardhmes,” tha CEO i Orlen, Ireneusz Fąfara, në një deklaratë për shtyp.
Vendimi pason një marrëveshje midis Orlen dhe Synthos Green Energy. Orlen, kompania më e madhe energjetike në Poloni, planifikon të ketë të paktën dy SMR me një kapacitet të kombinuar prej 0.6 gigavatësh deri në vitin 2035.
Sipas marrëveshjes, dy kompanitë do të krijojnë një sipërmarrje të përbashkët, Orlen Synthos Green Energy (OSGE), me nga 50% aksione secila. Një dispozitë kyçe e marrëveshjes i jep OSGE qasje të plotë në teknologjinë amerikane BWRX-300.
Kjo, sipas deklaratës, “do t’i lejojë kompanisë të ecë përpara me procesin që do të kulmojë me ndërtimin e centralit të parë bërthamor SMR të Polonisë në një vendndodhje me rëndësi kyçe për Orlen – në Włocławek.”
Polonia synon të largohet nga qymyri
Në vitin 2023, Polonia miratoi ndërtimin e 24 SMR-ve në gjashtë lokacione. Centrali i ardhshëm në Włocławek përfaqëson një hap tjetër kritik në strategjinë më të gjerë të vendit për t’u larguar nga lëndët djegëse fosile, veçanërisht qymyri.
Sipas një raporti të Forum Energii, në vitin 2019 Polonia dogji rreth 87% të gjithë qymyrit të konsumuar nga familjet në Bashkimin Evropian.
Orlen e përshkroi BWRX-300 si projektin më të avancuar teknologjikisht të SMR në botë.
“Qasja në këto zgjidhje e vendos OSGE, dhe rrjedhimisht Orlen-in, ndër pionierët në përdorimin e kësaj teknologjie,” theksoi kompania./Përshtati nga Euronews, ekofin.al
