“Plug and Play”, platforma e mirënjohur globale për mbështetjen e Startup-ve, me qendër në Shtetet e Bashkuara të Amerikës mbërrin edhe në Shqipëri, e pozicionuar tek Piramida, për t’u ofruar sipërmarrësve të rinj shqiptarë, një mundësi unike për startup-et e tyre që të rriten, të tërheqin investime kapitale, të pilotojnë teknologjinë dhe të forcojnë praninë në tregjet lokale dhe globale.
Programi i tyre është krijuar për t’u ofruar startup-eve akses të menjëhershëm në një përvojë globale dhe një rrjet të gjerë ndërkombëtar.
“Plug and Play” nuk do të jetë një platformë vetëm për Shqipërinë, por ka aspirata më të mëdha për sa i përket prezantimeve të start-up-eve, duke u bërë qendër rajonale për zhvillimin e teknologjisë dhe mbështetjen e tyre,” u shpreh Uranik Begu, drejtori i “Plug and Play” për Ballkanin Perëndimor.
Kryeministri Edi Rama ishte sot në ceremoninë e çeljes së “Plug & Play”, e cila në Shqipëri gjen mjedisin e duhur për të sjellë këto shërbime inovative për industri të ndryshme, me perspektivën që Shqipëria të kthehet në qendrën rajonale të këtyre sipërmarrjeve.
Platforma “Plug and Play” është zgjeruar globalisht në mbi 60 vendndodhje, në 25 industri me më shumë se 550 partnerë. Deri më sot, ka investuar në mbi 2000 kompani me vizionin për ta bërë inovacionin të hapur për këdo, kudo.
