Sektori i peshkimit në Shqipëri ka regjistruar një tkurrje gjatë vitit 2025, me sasinë totale të peshkut të zënë që ka rënë me 7,9% krahasuar me një vit më parë. Sipas të dhënave të publikuara nga Instituti i Statistikave (INSTAT), nga të gjitha kategoritë ujore janë kapur gjithsej 15.153 tonë peshk gjatë vitit 2025, kundrejt 16.452 tonëve të regjistruara në vitin 2024.
Të dhënat tregojnë se, pavarësisht rënies së përgjithshme të prodhimit, sektori vijon të mbështetet kryesisht nga akuakultura, ndërsa një rritje e fortë është evidentuar në kapjen e molusqeve.
Akuakultura mbetet shtylla kryesore e sektorit
Akuakultura vazhdon të përbëjë pjesën më të madhe të prodhimit të peshkut në vend, me 6.549 tonë ose 43,2% të totalit të zënieve. Megjithatë, edhe ky segment ka shënuar një rënie prej 8,6% krahasuar me vitin 2024, kur prodhimi arriti në 7.165 tonë.
Në të njëjtën kohë, ujërat e brendshme kontribuan me 3.007 tonë, duke përfaqësuar 19,8% të totalit, ndërsa peshkimi detar zuri 4.426 tonë ose 29,2% të prodhimit kombëtar.
Për të mbështetur rigjenerimin e resurseve ujore, gjatë vitit 2025 u prodhuan dhe u hodhën në liqenin e Ohrit rreth 1,2 milionë rasate të troftës ylber, 2 milionë rasate të koranit dhe 600 mijë rasate krapi.
Molusqet, segmenti me rritjen më të fortë
Ndër kategoritë e ndryshme të peshkimit, molusqet regjistruan performancën më pozitive. Sasia e tyre u rrit me 158,2%, duke kaluar nga 213 tonë në vitin 2024 në 550 tonë gjatë vitit 2025.
Në të kundërt, segmentet e tjera shënuan rënie si peshkimi në laguna u ul me 8,2%, nga 146 tonë në 134 tonë, peshkimi bregdetar ra me 12,1%, nga 554 tonë në 487 tonë, akuakultura shënoi tkurrjen prej 8,6%.
Karkaleci i thellësisë, sardelja dhe merluci dominojnë peshkimin detar
Sa i përket specieve kryesore të kapura në det, bregdet dhe laguna, tre lloje përbëjnë pjesën më të madhe të zënieve: karkaleci i thellësisë me 802 tonë ose 15,9%, sardelja me 765 tonë ose 15,2%, merluci me 693 tonë ose 13,7%.
Ndërkohë, në ujërat e brendshme dominojnë, karasi me 1.018 tonë ose 33,9%, skorta me 709 tonë ose 23,6%, krapi me 546 tonë ose 18,2%.
Rritet numri i subjekteve të licencuara
Pavarësisht rënies së prodhimit, aktiviteti ekonomik në sektorin e peshkimit ka shënuar zgjerim. Gjatë vitit 2025 janë licencuar 854 subjekte që ushtrojnë aktivitet peshkimi, ose 21 subjekte më shumë krahasuar me vitin 2024.
Flota shqiptare e peshkimit vijon të operojë kryesisht në Nën-Zonën Gjeografike 18, që përfshin zonën e Adriatikut të Jugut, duke mbetur një nga hapësirat më të rëndësishme për aktivitetin e peshkimit në vend.
Rënia e prodhimit total, e kombinuar me rritjen e numrit të operatorëve dhe zgjerimin e aktivitetit në segmente specifike si molusqet, tregon se sektori i peshkimit në Shqipëri po përballet me sfida të reja të qëndrueshmërisë, por njëkohësisht po kërkon të diversifikojë burimet e tij të prodhimit./ekofin.al
