Plazhet e Shqipërisë së Veriut janë goditur rëndë nga një valë mbeturinash që ka dalë në breg pas përmbytjeve të forta të fillimit të javës, duke e shndërruar vijën bregdetare në një mozaik të zymtë plastike, shisheve dhe mbetjeve të çdo lloji.
Pamjet nga Lezha zona më e prekur tregojnë shtresa të trasha mbetjesh të shtyra nga deti, ndërsa rreth 220 hektarë tokë vijojnë të mbeten nën ujë, sipas Agjencisë Kombëtare të Mbrojtjes Civile.
Stuhitë dhe rrymat detare kanë transportuar drejt bregut tonelata plastike dhe materiali të grumbulluar përgjatë lumenjve dhe zonave të përmbytura. Banorët thonë se ky fenomen përsëritet vit pas viti, duke u bërë tashmë një problem kronik që çon në ndotjen e ekosistemit detar dhe dëmton rëndë imazhin turistik të rajonit.
Rrymat e Adriatikut shtyjnë mbeturinat në Dubrovnik
Por problemet e përmbytjeve në veri kapërcejnë kufijtë rajonal. Dubrovniku po përballet me një valë mbytëse mbeturinash. Sipas komunitetit vendor dhe ekspertëve të mjedisit, një pjesë e tyre vjen nga brenda Shqipërisë, e transportuar nga rrjedhat e lumenjve dhe stuhitë drejt detit, e shtyrë në brigje nga erërat e forta si shiroku.
Autoritetet kroate raportojnë se sasi të mëdha plastike dhe mbetjesh arrijnë në brigjet e tyre pas stuhive të forta, duke dëmtuar imazhin e qytetit, i njohur globalisht për turizmin elitar dhe duke rrezikuar ekosistemin detar të Adriatikut jugor.
Sipas Dubrovnik Times, pastrimi i shpejtë dhe efikas u vlerësua nga kryebashkiaku Mato Franković. Punëtorët e “Čistoća”-s dhe Portit të Dubrovnikut po vazhdojnë punën për të pastruar pjesët e mbetura të vijës bregdetare, duke i kushtuar vëmendje të veçantë zonave ku mbeturinat grumbullohen më shpesh gjatë erërave të forta jugore. Megjithëse situata të ngjashme ndodhin vit pas viti, reagimi i shpejtë i shërbimeve të qytetit edhe këtë herë parandaloi çdo dëm afatgjatë mjedisor ose pamor në zonën bregdetare.
Kroacia ka ndërmarrë disa nisma për uljen e plastikës dhe mbrojtjen e detit, por autoritetet atje nënvizojnë se vetëm një bashkëpunim i koordinuar mes vendeve të Adriatikut, i mbështetur nga institucionet europiane, mund ta frenojë këtë problem që nuk njeh kufij.
