Tregu i komunikimeve celulare në Shqipëri gjatë tremujorit të dytë 2025 ka shfaqur një dinamikë të fortë në përdorim dhe konsum, duke reflektuar një sjellje gjithnjë e më të orientuar drejt internetit dhe paketave me vlerë të shtuar. Sipas të dhënave zyrtare të AKEP, numri i pajtimtarëve me karta SIM arriti në 3.27 milionë, një rritje e lehtë prej 0.4% krahasuar me tremujorin e parë, por që mbetet ndjeshëm më i ulët në krahasim me të njëjtën periudhë të vitit të kaluar, për shkak të pastrimit të bazave të të dhënave nga kartat joaktive dhe konsolidimit të tregut. Megjithatë, baza reale e përdoruesve aktivë është rritur. Në T2 2025 rezultojnë rreth 2.49 milionë përdorues aktivë të shërbimeve celulare, duke reflektuar një rritje prej 2.3% brenda tremujorit. Edhe përdoruesit aktivë të telefonisë celulare janë rritur në rreth 2.47 milionë, sinjal që konsumi i shërbimeve zanore mbetet i rëndësishëm për abonentët, pavarësisht migrimit të komunikimit drejt aplikacioneve OTT.
Një nga ndryshimet më të dukshme strukturore është rënia e përdorimit të planeve me parapagim dhe rritja e shpejtë e abonimeve me paspagim. Në harkun e një viti, pesha e parapagimit ka rënë nga 59.8% në 54.6%, duke reflektuar afrimin e konsumatorëve me paketa mujore që ofrojnë kombinime të mëdha të minutave, SMS-ve dhe trafikut të internetit. Të dy operatorët kryesorë ndjekin këtë prirje, me Vodafone Albania që shënon tashmë më shumë se gjysmën e përdoruesve aktivë në paspagim, ndërsa edhe One Albania ndjek të njëjtin trend.
Përdorimi i internetit celular ka qenë elementi dominues i rritjes në këtë tremujor. Trafiku total i të dhënave arriti në rreth 62 milionë gigabajt, duke shënuar rritje dyshifrore si ndaj tremujorit të parë (+11.1%), ashtu edhe ndaj së njëjtës periudhë të vitit të kaluar (+13.2%). Konsumi mesatar për përdorues ka arritur në 9.84 GB në muaj, niveli më i lartë i regjistruar ndonjëherë, çka dëshmon se interneti celular është shndërruar në një mjet thelbësor për konsum multimedial, shërbime streaming, rrjete sociale dhe komunikim të përditshëm. Edhe numri i përdoruesve aktivë të broadband-it celular ka shënuar rritje të dukshme prej 4% brenda tremujorit, duke arritur në mbi 2.09 milionë.
Në të njëjtën kohë, edhe trafiku i thirrjeve ka shfaqur rritje të qëndrueshme, duke shënuar rreth 1.06 miliardë minuta dalëse në T2 2025. Rritja prej 8.5% ndaj tremujorit të parë dhe 9% ndaj T2 2024 tregon se, megjithë dominimin e komunikimit përmes internetit, shërbimet zanore tradicionale mbeten të përdorura gjerësisht. Rritja ka prekur si thirrjet brenda rrjetit, ashtu edhe ato drejt rrjeteve të tjera, me një performancë veçanërisht të fortë të trafikut off-net, i cili është rritur me mbi 15% në terma vjetorë. Ky zhvillim sugjeron një treg më të balancuar dhe më shumë komunikim ndërmjet rrjeteve, si dhe oferta më konkurruese nga operatorët.
Ndërkohë, volumi i SMS-ve, megjithëse ka shënuar rritje tremujore prej 11.5%, mbetet në rënie të lehtë në krahasim me vitin e kaluar, duke dëshmuar zëvendësimin e tyre gradual nga platformat e komunikimit online. Rivaliteti midis dy operatorëve kryesorë mbetet i fortë: Vodafone kryeson në numrin e përdoruesve aktivë me rreth 1.26 milionë, ndërsa One Albania ndjek me rreth 1.23 milionë dhe diferencat janë të ngushta në segmente të ndryshme të tregut.
Në segmentin e rrjeteve fikse, tregu ka vijuar rritjen e qëndrueshme të aksesit broadband. Në T2 2025 numërohen rreth 694 mijë pajtimtarë me internet fiks, një rritje prej 7.3% në terma vjetorë. Rritja më e madhe është regjistruar te shërbimi “Internet Only”, i cili arrin në 395 mijë përdorues dhe shënon një rritje të dukshme prej 12.8% krahasuar me T2 2024. Paketat e integruara (Internet + TV dhe Internet + TV + Telefoni) mbeten të qëndrueshme, por nuk shënojnë ritme të forta zgjerimi, çka tregon se konsumatorët po preferojnë gjithnjë e më shumë shërbime të thjeshta dhe fleksibël të aksesit në internet. Telefoni fiks vazhdon rënien strukturore dhe në T2 2025 numri i linjave fikse është ulur në 156 mijë, një rënie prej 7.2% në terma vjetorë, duke konfirmuar se ky shërbim është tashmë në fazën e tij të maturitetit të plotë. /ekofin.al
