Mbi 600 ankesa janë depozitituar pranë Inspektoriatit të Punës nga punonjës të pakënaqur me trajtimin në punë gjatë vitit 2021. Referuar raportit të këtij institucionit, numri më i lartë i ankesave të depozituara rezulton nga punëmarrës që punojnë në subjektet të cilat zhvillojnë aktivitetin ekonomik në kryeqytet. Dhe problematika më e madhe vihet re në ndërmarrjet prodhuese me 150 inspektime në të cilat janë konstatuar dhe 66 punëmarrës informal, si edhe në sektorin e hoteleve dhe bar-restoranteve, me 132 ankesa, ku janë konstatuar dhe 35 punëmarrës informal.
Por për çfarë ankohen më së shumti punonjësit në Shqipëri? Raporti thekson se 32.7% e arsyes së denoncimit lidhet me cënim të marrëdhënieve të punës ku përfshihen mospagesë për punë të kryer në ditët e festave zyrtare, për punë të kryer në orë shtesë, dhënie page jo nëpërmjet sistemit bankar dhe moslidhje kontrate pune. 14.3% e arsyes së denoncimit lidhet me mospagesën e pagave të prapambetura. 8.9% e arsyes së denoncimit lidhet me mospagesë të kontributit të sigurimeve shoqërore dhe shëndetësore.
Në të gjitha rastet ku është konstatuar si shkelje nga Inspektoriati i Punës, shumica janë referuar te Tatimet, si organ kompetent për mbledhjen me forcë të detyrimeve të prapambetura. Gjithashtu një pjesë e ankesave dhe denoncimeve të punëmarrësve janë bërë për fshehjen e rasteve të aksidenteve në punë, mungesën e sigurisë në punë, etj.
