Sektori i shërbimeve në Shqipëri ka shfaqur një ecuri të diferencuar gjatë tremujorit të parë të vitit 2026, ku aktivitetet e lidhura me pasuritë e paluajtshme dhe turizmin kanë vijuar të jenë motorët kryesorë të rritjes, ndërsa transporti, komunikacioni dhe disa shërbime profesionale kanë regjistruar ngadalësim. Këtë e tregojnë të dhënat më të fundit të INSTAT për statistikat afatshkurtra të shërbimeve.
Aktiviteti me performancën më të fortë rezulton ai i pasurive të paluajtshme, ku indeksi i shitjeve neto në volum u rrit me 31.5% krahasuar me të njëjtën periudhë të vitit të kaluar. Njëkohësisht, ky sektor regjistroi edhe rritje të ndjeshme të punësimit me 22.5% dhe të fondit të pagave me 35%, duke reflektuar zgjerimin e vazhdueshëm të tregut imobiliar në vend.
Turizmi mbetet një tjetër shtyllë e rëndësishme e ekonomisë. Aktiviteti i hoteleve shënoi rritje vjetore prej 12.6% në shitje, ndërsa punësimi u zgjerua me 9.4% dhe fondi i pagave me 22%. Edhe sektori i bar-restoranteve vazhdoi trendin pozitiv, me rritje prej 8.4% të shitjeve dhe 14.6% të fondit të pagave. Këto të dhëna tregojnë se kërkesa turistike vijon të mbështesë ekonominë e shërbimeve edhe jashtë sezonit kulmor veror.
Pozitiv paraqitet edhe sektori i tregtisë, ku shitjet neto në volum u rritën me 4.6%, punësimi me 3.6% dhe fondi i pagave me 14.6%, duke reflektuar konsum më të lartë dhe aktivitet më të zgjeruar ekonomik. Rritje u regjistrua gjithashtu në aktivitetet e arkitekturës dhe inxhinierisë me 8% në shitje, si dhe në shërbimet e sigurimit dhe hetimit me 4.9%.
Në anën tjetër, transporti, magazinimi dhe posta shfaqën dobësi, me një rënie prej 3.8% të shitjeve neto në volum krahasuar me tremujorin e parë të vitit 2025, pavarësisht se punësimi në këtë sektor u rrit me 3.3%. Rënie regjistroi edhe sektori i informacionit dhe komunikacionit, ku shitjet u tkurrën me 1.6%, ndërsa aktivitetet ligjore dhe të kontabilitetit pësuan një rënie prej 4.3%.
Një nga treguesit më interesantë të raportit lidhet me pagat. Përveç pasurive të paluajtshme, rritje të forta të fondit të pagave u regjistruan në agjencitë e udhëtimit me 20.5%, në hotele me 22% dhe në sektorin e sigurimit me 14.8%, duke sinjalizuar presione në rritje për fuqinë punëtore dhe nevojën e bizneseve për të tërhequr staf në një treg pune gjithnjë e më konkurrues. /ekofin.al
