Agjencia e Administrimit të Pasurive të Sekuestruara dhe të Konfiskuara (AAPSK) ka shpallur një Thirrje për Shprehje Interesi për organizatat jofitimprurëse, duke hapur rrugën për financimin e projekteve që synojnë parandalimin e kriminalitetit dhe rehabilitimin social të grupeve më të rrezikuara në shoqëri.
Sipas dokumentacionit zyrtar, kjo thirrje mbështetet në kuadrin ligjor për parandalimin dhe goditjen e krimit të organizuar dhe zbatohet në përputhje me vendimet dhe udhëzimet e Komitetit Ndërinstitucional për Masat Kundër Krimit të Organizuar. Përmes këtij mekanizmi, AAPSK synon të kanalizojë të ardhurat nga pasuritë e sekuestruara dhe të konfiskuara drejt projekteve me ndikim konkret social, duke forcuar rolin e shtetit në parandalimin e fenomeneve kriminale dhe në mbështetjen e shtresave në nevojë.
Fushat prioritare të ndërhyrjes përfshijnë rehabilitimin social, kulturor dhe shëndetësor të shtresave vulnerabël, parandalimin e kriminalitetit dhe riintegrimin e personave të prekur prej tij, asistencën për viktimat e krimit të organizuar dhe trafikimit, si edhe rehabilitimin e përdoruesve të substancave narkotike. Një vëmendje e veçantë i kushtohet edhe mbrojtjes së familjarëve të punonjësve të Policisë së Shtetit të rënë në krye të detyrës, si dhe viktimave të trafikut të qenieve njerëzore.
Fondi total i vënë në dispozicion për këtë thirrje arrin në 15 milionë lekë, ndërsa vlera e financimit për çdo projekt do të përcaktohet sipas rregullave të parashikuara në udhëzimin përkatës. Aplikimi është i hapur për OJF-të e regjistruara në Shqipëri, të cilat kanë në objekt të veprimtarisë fushat e përfshira në këtë thirrje dhe që plotësojnë kriteret ligjore dhe financiare.
Procesi i aplikimit kërkon një dokumentacion të detajuar, përfshirë prova për statusin ligjor, situatën financiare dhe përmbushjen e detyrimeve tatimore e shoqërore. Afati i fundit për dorëzimin e aplikimeve është 30 ditë nga data e publikimit të thirrjes, ndërsa projektet mund të dorëzohen si fizikisht ashtu edhe elektronikisht pranë AAPSK.
Kjo nismë përfaqëson një tjetër hap në drejtim të ripërdorimit social të pasurive të konfiskuara, duke i kthyer ato në instrumente konkrete për parandalimin e kriminalitetit dhe forcimin e kohezionit social. Për Ekofin, thirrja e AAPSK konfirmon gjithashtu tendencën për ta shndërruar luftën kundër krimit të organizuar jo vetëm në një proces ndëshkues, por edhe në një mekanizëm zhvillimi dhe mbështetjeje për komunitetin.
