Edhe Pallati i Kongreseve do t’i jepet privatit, ashtu si një pjesë e pjesë e pronave shtetërore, të përfshira tashmë në inventarin e Koorporatës së Investimeve.
Kryeministri Edi Rama mori pjesë sot në aktivitetin e prezantimit të projektit për rijetëzimin e sheshit “Nënë Tereza” me një oaz të gjelbër kushtuar librit dhe një hapësirë dedikuar publikut.
Në fjalën e tij Rama u shpreh se, “Korporata Shqiptare e Investimeve do të shpallë edhe konkursin për rishpikjen, nëse mund të përdorim këtë fjalë, rikualifikimin e Pallatit të Kongreseve, me të njëjtën formulë si me stadiumin ku do të fitojmë një pallat kongresesh të transformuar, të rinovuar dhe patjetër do të shohim si do të paraqiten dhe cili do të jetë projekti më i mirë me konkurs ndërkombëtar”.
Kjo, theksoi Rama, “do të thotë do të duhet të mbështesim gjithë këtë zhvillime me më shumë parkingje nëntokësore dhe do të duhet të ecim edhe me një program të ri që kemi që është një program kombëtar, së bashku me Fondin e Zhvillimit, për një infrastrukturë parkimesh mbitokësore, por jo parkime mbitokësore si ato që keni parë nëpër aeroporte, që janë një shëmti totale, por parkime mbitokësore me një prekje magjike të këtyre ustallarëve të mëdhenj të arkitekturës, që do të jenë një tjetër atraksion për Shqipërinë, siç kanë mbetur atraksion pjesë të infrastrukturës së dikurshme ushtarake”.
Më herët, Qeveria ka deklaruar se edhe stadiumi “Selman Stërmasi” do të rijetëzohet, duke iu dhënë për zhvillim privatit, së bashku me një sërë pronash të tjera shtetërore në zona të lakmuara në kryeqytet. /ekofin.al
