Komisioni i përhershëm i Kuvendit, për Veprimtarinë Prodhuese, Tregtinë dhe Mjedisin, miratoi sot me shumicë votash, tre projektligjet e ndryshuar që shoqërojnë paketën fiskale të vitit 2022, ndërsa do t’i parashtrojë Komisionit të Ekonomisë dhe Financave ndryshimet e propozuara.
Komisioni shqyrtoi dhe miratoi nën për nen, projektligjet:”Për disa ndryshime dhe shtesa në Ligjin “Për akcizat në Republikën e Shqipërisë”, të ndryshuar”; “Për disa shtesa në Ligjin “Për taksat kombëtare”, të ndryshuar”; “Për një shtesë dhe disa ndryshime në Ligjin “Për tatimin mbi vlerën e shtuar”, të ndryshuar”.
Gjatë diskutimit në komision, deputetët e mazhorancës, propozuan që produktet e gazit dhe të lëngëta që konsumohen nga familjarët të markohen, sikurse zbatohet markimi i naftës për peshkimin dhe bujqësinë, duke i lehtësuar familjarët nga tatimi i unifikuar 6%. Gjithashtu për rimbursimin e lëndës djegëse për industrinë, u propozua që rimbursimi të jetë vetëm për lëndët djegëse që importohen dhe jo për ato që prodhohen në vend, me qëllim që t’i japim frymëmarrje industrisë përpunuese dhe prodhuese të lëndëve djegëse.
Deputetët e opozitës u shprehën në mbështetje të dy amendamenteve të propozuara nga mazhoranca në projektligjin për akzicën.
“Taksa 6 lekë për gazin është rëndesë për qytetarin. Mbështesim edhe rimbursimin e TVSH-së për lëndët djegëse në industrinë e çimentos, tullave dhe atë farmaceutike, sepse janë propozime racionale të ardhura edhe nga të gjitha grupet e interesit”, tha deputeti i opozitës Helidon Bushati.
Ndërsa deputeti Agron Duka, kërkoi shtyrjen e hyrjes në fuqi, të skemës së ndryshuar për TVSH-së në bujqësi dhe industrinë e qumështit, duke i dhënë kështu kohë diskutimit të kësaj çështje, pasi siç tha Duka, “zëri i fermerëve shqiptarë është kundër ndryshimeve të propozuara”.
Duke marrë fjalën, kryetari i Komisionit të Veprimtarisë Prodhuese, Tregtisë dhe Mjedisit, Arben Pëllumbi bëri të ditur se, “propozimet e parashtruara do t’i paraqiten Komisionit të Ekonomisë dhe Financave, si komisioni përgjegjës për reflektimin e ndryshime në pr/ligjet që shoqërojnë paketën fiskale”.
