Ministria e Brendshme ka vendosur të lehtësojë procedurat për pajisjen me dokumenta identifikimi për qytetarët shqiptarë jashtë vendit. Duke filluar nga sot, shqiptarët jashtë vendit do të kenë mundësinë të aplikojnë për letërnjoftim elektronik, ose për pasaportë biometrike, pa qenë më e nevojshme të pajisen detyrimisht me të dy dokumentet njëkohësisht.
Sipas Ministrisë së Brendshme, nisma ka qëllim thjeshtimin e procedurave dhe lehtësimin e qytetarëve, që jetojnë e punojnë jashtë Shqipërisë. Kjo pritet të shoqërohet edhe me një ulje të kostove për qytetarët shqiptarë, pasi deri më sot, ata duhet të aplikonin njëkohësisht për të dy dokumentat.
Ministria informon se ndryshimi vjen edhe si përgjigje ndaj kërkesave të vazhdueshme të diasporës shqiptare, për të lehtësuar aksesin në dokumentet e nevojshme për ta.
Ministria e Brendshme thekson se, përmes kompanisë shtetërore IdentiTek SHA, mbetet e përkushtuar të vijojë përmirësimin e shërbimeve për të gjithë qytetarët shqiptarë, kudo që ndodhen, e të sigurojë akses të barabartë dhe të thjeshtë për të marrë dokumentet e nevojshme.
Gjithashtu, MB fton të gjithë qytetarët e interesuar të vizitojnë përfaqësitë diplomatike të Shqipërisë për më shumë informacion e për të kryer aplikimet për letërnjoftim elektronik.
