Qeveria ka përcaktuar në mbledhjen e fundit kriteret për përfitimin e pagesave të udhëtimit në bazë të kilometrave të largësisë për punonjësit e policisë.
Kështu nga 36 km deri 60 km, do të përfitojë në masën 10 000 (dhjetë mijë) lekë në muaj;
Nga 61 km deri 100 km, në masën 15 000 (pesëmbëdhjetë mijë) lekë në muaj. Nga 101 km deri 150 km, në masën 20 000 (njëzet mijë) lekë në muaj. Nga 150 km deri 200 km, në masën 25 000 (njëzet e pesë mijë) lekë në muaj. Mbi 200 km, në masën 30 000 (tridhjetë mijë) lekë në muaj.
Po ashtu, në VKM thuhet se kur punonjësi i policisë emërohet, transferohet në mënyrë të përhershme apo të përkohshme për nevoja pune dhe shërbimi dhe, për këtë shkak, bashkëshortja/i humbet marrëdhëniet e punës, në rast të pamundësisë së punësimit, i jepet një pagesë, deri në çastin e punësimit, në masën:
- a) 50 % të pagës bazë minimale mujore në shkallë vendi, të miratuar nga Këshilli i Ministrave, kur bashkëshortja/i ka vjetërsi pune mbi 1 (një) vit dhe shtesë në masën 5% të pagës bazë minimale mujore në shkallë vendi, për çdo vit mbi 1 (një) vit, por jo më shumë se paga bazë minimale në shkallë vendi;
- b) 100 % të pagës mesatare mujore të vitit të fundit të punës, por jo më shumë se 150% të pagës bazë minimale mujore në shkallë vendi, të miratuar nga Këshilli i Ministrave, kur bashkëshortja/i ka vjetërsi në punë mbi 10 (dhjetë) vjet.
Gjithashtu kur punonjësi i policisë emërohet/transferohet jashtë vendbanimit të tij të përhershëm, brenda vendit dhe jashtë vendit, i paguhet qiraja e banesës, kur nuk i sigurohet ajo.
