Të ardhurat nga Tatimi mbi Vlerën e Shtuar (TVSH) në 2024-ën parashikohet të jenë rreth 211.2 miliardë lekë, 11.2 miliardë lekë ose 5.6% më shumë se ato që priten të mblidhen për vitin 2023.
Ministria e Financave dhe Ekonomisë renditi në projektbuxhetin e vitit 2024 edhe burimet e rritjes së TVSH-së.
Konkretisht, MFE rendit si burime rritjen e të ardhurave nga TVSH që gjeneron rritja ekonomike shtesë dhe indeksi i çmimeve, rritjen e të ardhurave nga sektorë në ekspansion si turizmi, akomodimi dhe gjithë sektorët e tjerë të zinxhirit ekonomik që furnizojnë turizmin, si dhe përmirësimin e administrimit të TVSH-së nga sistemi i fiskalizimit dhe konsolidimi i faturimit elektronik.
Të ardhurat nga TVSH-ja në import gjatë periudhës janar-shtator të këtij viti janë realizuar në vlerën 107.7 miliardë lekë, me mosrealizim në masën 10.3% kundrejt planit të periudhës. Sipas MFE-së, të ardhurat nga TVSH në import janë impaktuar ndjeshëm nga ndryshimet e forta të kursit të këmbimit, të cilat kanë ulur bazën e llogaritjes së TVSH-së për mallrat e importit.
Rritja e TVSH-së për shkak të rritjes së volumeve të importit të mallrave nuk ka kompensuar uljen e ndjeshme të TVSH-së për shkak të zvogëlimit të bazës së llogaritjes së TVSH-së si rezultat i zhvlerësimit të euros dhe dollarit.
Të ardhurat nga TVSH-ja brenda vendit janë realizuar në vlerën 35.8 miliardë lekë, ose 4.6 miliardë lekë më shumë se plani i periudhës.
Rimbursimi i TVSH është realizuar në vlerën 14.6 miliardë lekë, 9.7% ose 1.3 miliardë lekë më shumë se plani i periudhës për 9-mujorin e vitit 2023.
