Të dhënat e fundit, të Autoritetit të Komunikimeve Elektronike dhe Postare (AKEP) përsa i përket përdoruesve aktivë të kompanive të telefonisë celularë sugjerojnë rritje të konkurencës, sidomos mes dy operatorëve kryesorë Vodafone Albania dhe One Telecommunications.
Në fund të shtatorit, sipas këtyre shifrave, Vodafone Albania, prej vitesh dominant në treg, zotëronte rreth 43% të përdoruesve, dukshëm më pak se shifra prej 47% që kishte në fund të vitit 2020, ndërkohë që në fund të vitit 2019 zotëronte 48% të tregut. Në anën tjetër, në fund të shtatorit, ONE zotëronte rreth 41% të tregut, me rreth 1.1 milionë përdorues aktivë. Përgjatë këtij viti, kjo kompani ka performuar shumë mirë, marrë në konsideratë se në fund të vitit 2020 zotëronte rreth 37% të tregut të përdoruesve të telefonisë celulare. Ndërkohë, operatori i tretë, Albtelecom, në fund të shtatorit kishte një pjesë tregu të qëndrueshme në nivelin 16%, po aq sa në fund të vitit të kaluar.
Ndryshimi i pronësisë së kompaninë ONE dy vjet më parë i ka dhënë një rritje të ndjeshme performancës së saj, duke ndikuar direkt edhe në rritjen dhe gjallërimin e konkurrencës në tregun celular në Shqipëri. Duke marrë në konsideratë edhe performacën financiare përgjatë një viti të vështirë siç ishte ai pandemik 2020, ONE ishte e vetmja kompani që arriti të përmirësonte rezultatin e saj. Kështu, për vitin 2020, ajo raportoi një fitim në vlerën e 820 milionë lekëve, me rritje të konsiderueshme krahasuar me vitin 2019. Me shifrat e rritjes së përqindjes së abonentëve në treg, parashikohet që edhe viti aktual të jetë një vit i suksesshëm për ONE. / Ekofin
