Dy njësi të lëvizshme të shërbimit dentar do të jenë në dispozicion të zonave rurale, për të rritur aksesin në shërbimin dentar për fëmijët e shkollave.
Ministrja Manastirliu gjatë prezantimit të tyre, tha se dy njësitë do kenë edhe stomatologët, infermierët, teknikët të cilët do të kujdesen për shëndetin oral të fëmijëve në zonat e thella.
“Tashmë ne vijmë me një stad të ri të investimeve për sa i përket programit të dentistrisë për fëmijët në shkolla dhe janë pikërisht këto dy njësi të lëvizshme të kujdesit dentar që do të mundësojnë që jo vetëm të kemi një kujdes dentar për fëmijët në zonat urbane, por edhe në zonat e thella, nëpërmjet njësive të lëvizshme, të cilat do të kenë edhe stomatologët, infermierët, teknikët që do të kujdesen për shëndetin oral të fëmijëve në zonat e thella”,- tha Manastirliu.
Gjithashtu ministrja Manastirliu shtoi se njësitë e lëvizshme dentare do të jenë edhe në të gjithë vendin, e kjo sipas një kalendari të caktuar.
Manastirliu, së bashku me ambasadoren e Zvicrës, Ruth Huber, dhe përfaqësues të strukturave shëndetësore morën pjesë në aktivitetin për prezantimin e dy njësive të lëvizshme të dentistrisë.
Huber, e konsideroi një investim të rëndësishme për kujdesit dentar të fëmijëve në zonat rurale.
“Jam shumë e lumtur te jem me ju sot në inaugurimin e dy njësive të lëvizshme të kujdesit dentar për fëmijët e moshave shkollore të financuara nga ambasada e Zvicrës. Dy njësitë e lëvizshme plotësojnë investimin e qeverisë shqiptare në ofrimin e këtij shërbimi për fëmijët të cilët jetojnë në zonat rurale”,- u shpreh Huber.
Njësitë e lëvizshme janë të pajisura me pajisje të fjalës së fundit të teknologjisë dhe do të shërbejnë si kabinete dentare të lëvizshme për nxënësit e shkollave, kryesisht në zonat rurale.
