Vajza e presidentit amerikan Donald Trump, Ivanka Trump ka folur dy ditë më parë për sipërmarrësin dhe podkasterin amerikan David Senra për investimin në ishullin e Sazanit në Jug të Shqipërisë.
Në një bisedë të gjatë të publikuar më 31 maj në kanalin në You Tube të Senra, të fokusuar mbi sipërmarrjen, menaxhimin e bizneseve familjare Ivanka Trump ka rrëfyer si është gjendur në ishull dhe më pas magjepsjen nga natyra dhe potencialin e parë te ky vend.
“Po punoj në një projekt të jashtëzakonshëm me bashkëshortin tim në Mesdhe. Është gjigant…. Është një ishull privat, i mrekullueshëm prej 1,400 hektarësh në mes të Mesdheut. Ne ishim në varkën e një miku dhe ndaluam për të notuar dhe kështu e gjetëm.
Notuam deri në ishull, u ngjitëm në majë dhe thjesht u magjepsëm dhe qëndroi me ne që atëherë. Përgjatë disa viteve ne zhvilluam mundësinë për të kuptuar potencialin e tij dhe transformimin e tij, por me shumë vetëpërmbajtje dhe kujdes sepse toka është shumë e bukur dhe me të vërtetë arkitektura duhet të jetë plotësisht e integruar në të, thuajse të lindë nga ajo”, deklaron Ivanka Trump.
Duke elaboruar vizionin e saj për Sazanin, ajo tha se dëshiron diçka që të jetë njëkohësisht e bukur, por edhe për njerëzit, mënyrën se si duan të jetojnë dhe për këtë arsye deklaroi se po punohet me arkitektët më të mirë që ekzistojnë sot për sot.
“E ndiej më shumë si një sfidë nga gjithçka tjetër. Kulmimi i gjithë eksperiencës sime në real estate, të gjithë udhëtimeve të mia, shumë reflektim në atë se si dua të jetoj, si mendoj unë që njerëzit gjithmonë e më shumë duan të jetojnë dhe përpiqen të ndërtojnë diçka që është një manifestim i prekshëm i saj. Kjo kërkon shumë vizion, bashkëpunimin e disa ekspertëve më të mirë që ekzistojnë.
Pra, unë isha aty, duke ecur në tokë, duke u përpjekur të isha me të dhe ta ndieja krahas disa prej arkitektëve më të shkëlqyer që ekzistojnë, ekspertë të vërtetë në punën e tyre, njerëz me integritet absolut që nuk komprometohen dhe kjo është diçka që ne duam të krijojmë atje. Pra, jemi shumë entuziastë”, tha ajo.
Deklaratën e saj mund ta gjeni në minutat e para të intervistës, duke nisur nga 1:48.
