Që prej momentit kur iu bashkua Vodafone-it 15 vite më parë, Susan Foxton ka punuar për kompaninë në Katar, Londër dhe Dublin, ndërsa tani ka pak kohë që ka ardhur në Shqipëri, ku nga prilli 2025 mban pozicionin e drejtoreshës së biznesit të konsumatorit për këtë treg me rritje të shpejtë.
“Ishte një ofertë shumë e mirë për t’u refuzuar, pasi është e rrallë të gjesh një rol ku ke mundësinë të zhvillosh dhe të zotërosh strategjinë në mënyrë holistike dhe të kesh një ndikim real,” thotë Foxton.
“Ishte gjithashtu një mundësi fantastike për të përjetuar një kulturë të re, në një rol që ofron si sfidë profesionale, ashtu edhe mundësinë për të bërë një ndryshim të vërtetë në një treg në zhvillim.
“Shqipëria ndodhet në një moment kyç. Sektori i telekomunikacionit – dhe në fakt i gjithë peizazhi i biznesit – po ndryshon me shpejtësi, dhe drejtimi i biznesit të konsumatorit do të thotë të ndikosh drejtpërdrejt në jetën e përditshme të miliona shqiptarëve.”
Foxton u largua për herë të parë nga Irlanda drejt Katarit në vitin 2009, si pasojë e recesionit ekonomik.
“U larguam nga nevoja, por e shfrytëzuam maksimalisht këtë mundësi. Ajo na lejoi të kursenim për të blerë një shtëpi dhe të martoheshim. Atje lindën edhe vajzat tona binjake,” tregon Foxton, e cila fillimisht iu bashkua Vodafone-it si specialiste e komunikimit në marketing.
Zhvendosja në Katar ishte një ndryshim i madh në vetvete, por për Foxton ishte edhe më sfiduese, pasi ajo po ndërronte edhe punëdhënës dhe po merrte për herë të parë një rol në marketing.
Me profesion kontabiliste, ajo kishte kryer praktikën profesionale pranë KPMG-së dhe më pas kishte kaluar te Dunnes Stores në një rol financiar. Megjithatë, pas 18 muajsh, ajo nisi të ndjente mungesë kënaqësie në punën e saj.
“U largova sepse ndjeja se pjesa më e madhe e punës që bëja – në fushën e taksave – ishte gjithmonë pas faktit. Mendova se në sektorin privat do të ishte ndryshe, por gabova. Sërish po merresha me punë ‘historike’, me shumë pak mundësi për të ndikuar realisht në drejtimin e biznesit nga dita në ditë,” shpjegon ajo.
Kalimi nga kontabiliteti në marketing nuk ishte hapi më i madh drejt të panjohurës për Foxton. Ajo kishte realizuar edhe më herët në karrierë kapërcime të tilla.
Ajo kishte studiuar filozofi në Queen’s University Belfast dhe, duke qenë se mundësitë e punës për filozofët ishin të pakta, po mendonte se si mund të siguronte jetesën. Një vizitë rastësore në panairin e punës (“milk round”), së bashku me dy shokë shtëpie që studionin kontabilitet, e çoi drejt KPMG-së, ku iu ofrua mundësia për të ndjekur një kurs konvertimi të financuar në DCU.
“Mendova: pse jo? Dhe ajo që pasoi ishte një trajnim shumë i mirë në KPMG, ku mësova shumë për komunikimin me klientët dhe për punën nën presion afatesh,” thotë ajo.
Sot, ajo dhe familja e saj jetojnë pak jashtë Tiranës, kryeqytetit të Shqipërisë, ndërsa vajzat binjake ndjekin arsimin në një shkollë ndërkombëtare, në nivelin ekuivalent me klasën e gjashtë.
“Me vjen turp ta pranoj, por dija shumë pak për Shqipërinë para se të vija këtu. Prandaj ka qenë kënaqësi të zbuloj mozaikun e pasur të historisë dhe kulturës shqiptare dhe të rajonit më të gjerë të Ballkanit. Edhe moti është një avantazh i madh – rreth 300 ditë me diell në vit. Ushqimi është fantastik dhe mikpritja po ashtu.
“Kam vënë re shumë ngjashmëri me kulturën irlandeze – ndjenjën e fortë të krenarisë kombëtare, humorin dhe qëndrueshmërinë. Shqiptarët, ashtu si irlandezët, kanë një identitet të thellë dhe ndjesinë se ‘ia dalin më shumë sesa pritet’ në skenën globale.
“Afërsia me kaq shumë destinacione udhëtimi është një tjetër bonus. Mund të fluturosh për në Itali me vetëm 30 euro. Interesant është fakti se ende nuk kam takuar asnjë irlandez tjetër këtu. Nuk ka komunitete irlandeze apo klube GAA, gjë që është e rrallë. Kështu që ne po e jetojmë plotësisht këtë kulturë të re.
“Ka qenë një përvojë e jashtëzakonshme mësimi për të gjithë familjen dhe zgjimi çdo ditë me diell ndikon shumë pozitivisht në shëndetin mendor.”
Në aspektin profesional, Foxton thotë se kjo lëvizje i ka mundësuar të bëjë hapa të mëdhenj në karrierë, të cilët në Irlandë do t’i kishin marrë shumë më tepër kohë.
“Në Katar, bëra një ndryshim të plotë në karrierë dhe kalimi im në marketing më vendosi në një rrugë që më ka çuar drejt roleve drejtuese të nivelit të lartë,” shpjegon ajo. “Tani, në Shqipëri, po mbështetem në përvojën time në lidership, zhvillimin e ekipeve, si dhe në fushën e shërbimeve dixhitale dhe broadband-it fiks, për të transformuar dhe rritur biznesin e konsumatorit të Vodafone Albania.
“Tregu dinamik i telekomunikacionit në Irlandë më ka mësuar vlerën e fleksibilitetit, orientimit ndaj klientit dhe inovacionit, të cilat po i zbatoj edhe këtu,” shton ajo. “Të punosh në një ekonomi dhe mjedis biznesi të ndryshëm të sfidon. Duhet të çmësosh, të rimësosh, të përshtatesh shpejt dhe të gjesh mënyra për të aplikuar përvojën tënde në një kontekst të ri. Pikërisht aty ndodh rritja e vërtetë.”
Shqipëria po përjeton një rritje të fortë të turizmit dhe gjuha angleze flitet gjerësisht, veçanërisht në zonat urbane.
“Ne e zhvillojmë aktivitetin tonë në anglisht, gjë që është e favorshme për mua, por më është dashur të përshtas stilin tim të komunikimit. Në Irlandë, të thuash se je i zhgënjyer ka peshë. Këtu nuk përçohet në të njëjtën mënyrë. Kam mësuar të jem më e drejtpërdrejtë dhe më këmbëngulëse, dhe kjo ka qenë një ndryshim shumë i vlefshëm,” thotë Foxton.
“Në Irlandë thuhet se ‘të gjithë njohin të gjithë’, por me një popullsi prej vetëm 2.7 milionë banorësh, kjo është edhe më e vërtetë këtu. Është një shoqëri shumë e lidhur dhe reputacioni ka rëndësi të madhe. Gjithçka funksionon përmes marrëdhënieve. Besimi ndërtohet me kalimin e kohës, shpesh gjatë shumë kafeve, përpara se të kalosh te biznesi.”
Shqipëria është kryesisht një treg konsumatori për Vodafone-in dhe infrastruktura dixhitale është ende në zhvillim. Shumica e klientëve paguajnë faturat me para në dorë, në dyqane, dhe një nga sfidat kryesore për Foxton është ndërtimi i besimit në platformat dixhitale dhe nxitja e përdorimit të pagesave elektronike.
“Njerëzit këtu janë të etur për ide të reja,” thotë ajo. “Nëse ke diçka të freskët, mund ta testosh, ta përmirësosh dhe ta hedhësh në treg shumë më shpejt sesa në një treg më të madh dhe më të konsoliduar. Është emocionuese dhe ideale për këdo që i pëlqen të lëvizë shpejt dhe të mendojë në mënyrë krijuese.” / Përshtati nga “The Irish Times”, ekofin.al
