Bizum, aplikacioni që tashmë e ka bërë paranë cash pothuajse të panevojshme në darkat dhe takimet sociale në Spanjë, tani po hyn edhe në dyqanet fizike.
Ndryshimi është teknik, por pasojat shkojnë shumë përtej pagesave. Deri më tani, kur përdoruesit afronin telefonin ose kartën në terminalin e pagesës, transaksioni kalonte përmes rrjeteve të Visa ose Mastercard.
Për çdo pagesë, tregtarët paguajnë tarifa shërbimi dhe komisione për këto rrjete kartash. Ndërkohë, të dhënat e shpenzimeve përpunohen në serverë përtej Atlantikut dhe mund të përdoren për të krijuar profile të konsumatorëve.
Nga 18 maji, kjo do të ndryshojë. Duke përdorur teknologjinë NFC, Bizum Pay do të transferojë paratë direkt nga llogaria e klientit te ajo e tregtarit përmes transfertave të menjëhershme, duke eliminuar ndërmjetësit e huaj dhe duke reduktuar varësinë nga infrastruktura amerikane.
“Armada” spanjolle e Bizum
Ajo që nisi si një eksperiment ndërveprueshmërie mes bankave spanjolle është kthyer gradualisht në një ekosistem që po tërheq vëmendjen si në Bruksel ashtu edhe në Nju Jork.
Platforma ka tashmë më shumë se 30 milionë përdorues – praktikisht e gjithë popullsia adulte me llogari bankare në Spanjë – si edhe 111,000 biznese të integruara në ekosistemin digjital dhe rreth 40 institucione bankare që formojnë një bllok të unifikuar, duke arritur diçka që Gjermania dhe Franca ende nuk e kanë realizuar.
Në vitin 2025, Bizum arriti në 3.4 milionë transferta të menjëhershme në ditë.
Zbatimi fillestar do të udhëhiqet nga banka si CaixaBank, Sabadell dhe Bankinter. Bankat e tjera pritet të bashkohen gradualisht, ndërsa implementimi i plotë parashikohet para fundit të vitit, megjithëse shtysa kryesore për konsumatorët pritet në shtator ose tetor.
Çfarë ndryshon dhe për kë?
Nëse tregtia elektronike është një tregues – ku Bizum e mbylli vitin 2025 me mbi 100 milionë pagesa dhe uli ndjeshëm rastet kur konsumatorët braktisin blerjet online – atëherë rritja në tregtinë fizike mund të jetë e konsiderueshme.
Në një horizont prej dy deri në tre vitesh, pritshmëria më realiste është që Bizum të kapë mes 25% dhe 35% të volumit total të pagesave në dyqanet fizike në Spanjë.
Avantazhi i tij nuk lidhet vetëm me kostot më të ulëta për tregtarët, por edhe me faktin se për përdoruesit ai është tashmë metoda standarde e pagesës.
Kur sisteme kombëtare si Pix në Brazil ose UPI në Indi kanë filluar të marrin pjesë tregu, rrjetet amerikane historikisht kanë aktivizuar dy strategji kryesore.
E para është besnikëria ndaj klientit: shtimi i programeve cashback, sigurimeve për blerjet dhe pikëve të shpërblimit, të cilat Bizum – si sistem transfertash direkte – ende nuk i ofron.
E dyta është kredia: pagesat e shtyra mbeten arma e tyre më e fortë. Bizum transferon para reale menjëherë, ndërsa Visa dhe Mastercard “shesin kohë”. Pritet që ato të mbrojnë segmentin e blerjeve me vlerë të lartë dhe të konkurrojnë fort edhe në mikro-pagesa.
Ndërsa bankat spanjolle ranë shpejt dakord për një standard të vetëm, sistemet e pjesës tjetër të Europës u zhvilluan të fragmentuara. Spanja jo vetëm që ka një model për të eksportuar, por tashmë po udhëheq edhe Aleancën EuroPA.
Modeli spanjoll po pozicionohet tani si bazë për European Payments Initiative (EPI), me ambicien që një spanjoll një ditë të mund të paguajë në një kafene në Milano ose në një bar në Lisbonë po aq lehtë sa dërgon sot 10 euro për një dhuratë ditëlindjeje.
Për bizneset që kanë vetëm klientë spanjollë, pagesa e komisioneve ndaj agregatorëve ndërkombëtarë si Stripe, Adyen apo PayPal ka gjasa të bëhet gjithnjë e më pak e arsyeshme.
Bizum ofron likuidim të menjëhershëm të pagesave dhe tarifa dukshëm më të ulëta për tregtarët sesa komisionet tipike 0.2%-2% të rrjeteve të kartave. Nëse eksperienca në dyqan do të jetë po aq e thjeshtë sa ajo online, tregtia lokale do të ketë një motiv të qartë financiar për të preferuar sistemin vendas./Përshtati nga Euronews, ekofin.al
